Politica

Parlamentario Rocco Tjon: Gabinete Wever-Croes innovando servicionan gubernamental


ORANJESTAD, Aruba

Parlamento nos a ricibi un update for di e “Chief Innovation Officer” di Gobierno. A duna un splicacion amplio di e Aruba E-Government Roadmap 2020-2030. E vision di Gabinete Wever-Croes ta pa e aparato gubernamental bira uno pro-activo cu ta anticipa riba e necesidad di e ciudadano y brinda un bon servicio atraves di innovacion. Den cuadro di esaki e meta principal ta pa cada ciudadano por tin acceso na servicionan gubernamental na tur momento y na un manera sigur.

Infrastructura adecua pa por comparti informacion digital ta esencial pa logra e meta aki. Mes importante ta e infrastructura legislativo y p’esey tin hopi trabou a wordo ehecuta conhunto cu “Directie Wetgeving” (DWJZ). Tin un inventarisacion a wordo haci y un comparacion cu Estonia pa asina por logra e vision pa digitalisa e servicionan di e aparato gubernamental. 

INVESTIGACION IMPARCIAL

Prome cu por a ehecuta y implementa e maneho nobo di Gabinete Wever-Croes mester a haci un investigacion imparcial. Na 2018 tin un “assesment” digital a wordo haci pa asina sa exactamente kico falta den e aparato gubernamental. Den cuadro di e “assesment” aki a papia cu “stakeholders” y e investigacion mes a wordo haci door di profesionalnan di Estonia. Sr. Linnar Viik ta director di e e-Governance Academy na Estonia y tin mas cu 18 aña di experencia den e ramo aki y a conseha mas cu 130 pais y 200 organisacion riba implementacion di proyectonan di digitalisacion. 

E conclusion di e assesment aki ta cu Gabinete Eman no a inverti den e aparato gubernamental pa loke ta digitalisacion y inovacion. Y p’esey mes e innovacion tan desea ta tuma mas tempo. Tin hopi trabounan riba aspectonan legislativo, di maneho, di digitalisacion y infrastructura cu mester tuma lugar prome cu por implementa e “roadmap”.

ACCIONAN 2020

Durante 2018 y 2019 a inverti hopi pa crea e condicionnan necesario y pa 2020 e prioridad y accionnan concreto pa e prome lunanan ta pa concretisa “E-government guidelines” cu ta bay ta aplicabel pa e aparato gubernamental. Di e forma aki por cuminsa brinda servicionan atraves di un plataforma digital. Esaki lo hisa eficiencia di e aparato gubernamental y tambe mehora e experencia di cada ciudadano na momento cu e haci uzo di e servicionan di gobierno. E siman aki tin diferente curso y trainingnan ta tuma lugar pa personal di e aparato gubernamental cuminza familiariza nan mes cu e manera nobo di bay traha.

PA CONCLUI

Nos no por keda sin menciona cu nos ta lamenta profundamente cu fraccion di AVP tawata ausente awe durante e reunion. Esaki despues cu nan a critica e maneho di Gabinete Wever-Croes, pa loke ta innovacion, masha fuerte. Loke ta mas lamentabel ta cu nan a te hasta critica e profeshonalnan cu ta haci un trabou tremendo pa logra implenta e innovacion tan desea den e aparato gubernamental, despues cu esaki a wordo neglisha pa Gabinete Eman.


Related posts

‘Nos studiantenan na Hulanda merece Stabilidad y mas sosten berdadero’

EA News Author

Minister Xiomara Maduro ta presenta otro programa informativo ‘Haci nos Herencia Cultural accesibel!’

EA News Author

Prome Minister Evelyn Wever-Croes: Secretario di estado knops lo ta na aruba e siman aki pa atende algun reunion

EA News Author

Leave a Comment