Parlamentario Shailiny Tromp-Lee, presidente di Comision di Finansas di Parlamento di Aruba, a expresa su preocupacion profundo riba lo cu e ta describi como un falta di democracia den Parlamento. Segun e parlamentario, decisionnan importante pa futuro di Aruba ta wordo tuma sin e proceso democratico adecuado.
Tromp-Lee a lamenta e situacion actual y a indica cu Aruba ta atravesando un momento critico, autonomia di pais ta na peliger. E parlamentario ta sostene cu e situacion aki ta desaroya cu conocemento tanto di Hulanda como di liderazgo di gobierno di Aruba.
Segun Tromp-Lee, un di e preocupacionnan principal ta cu presidente di Parlamento no a convoca un reunion formal pa trata e asunto di Rijkswet HOFA, un tema cu, tin implicacionnan importante pa posicion financiero y autonomia di Aruba dentro di Reino Hulandes.
“Parlamento mester discuti e asunto aki di manera habri y transparente,” Tromp-Lee a indica e falta di un reunion oficial pa trata e tema ta contribui na un situacion unda Parlamento no ta eherce su rol di control y supervision manera ta stipula den e sistema democratico.
Ademas, Tromp-Lee a critica e forma di gobernacion di e coalicion actual AVP–Futuro, alegando cu e manera cu decisionnan ta wordo maneha ta debilita e proceso democratico. Segun e parlamentario, e practica actual ta percibi como un forma di gobernacion cu limita participacion y debate den Parlamento.
E parlamentario a enfatisa cu proteccion di autonomia di Aruba y respet pa e proceso democratico mester keda prioridad pa tur actor politico den pais. Segun Declaracion di Parlamentario Shailiny Tromp-Lee, Presidente di Comision di Finansas di Parlamento di Aruba.