Cada dia cu pasa ta bira mas bisto cu Gobierno di AVP-FUTURO no tin e capacidad pa goberna Aruba. Nan ta core pa nan responsabilidad, nan no ta tuma decision na tempo, nan ta culpa otro ora cos bay malo y nan ta perde cabes apenas presion publico aumenta.
Parlamento ta wordo evita
Den aña parlamentario 2025–2026, di 29 reunion publico solicita, solamente 11 a wordo convoca. Di 8 vragenuur solicita, solamente 2 a wordo yama.
Den 3 di cada 4 caso Parlamento no a haya oportunidad pa cuestiona Gobierno. Ministernan no ta contesta pregunta y hasta parlamentario mester recuri na LAR pa obliga un minister responsabel pa 5 cartera (!) duna informacion. Un Gobierno cu tin miedo di pregunta, tin miedo di duna cuenta.
Nan no ta tuma decision
E proceso pa regula sector di UTV y ATV a cuminsa desde 2021. Gobierno actual a haya e trabou, e documentonan y e recomendacionnan den su man. Despues di mas di un aña, nan no a completa e proceso, no a presenta solucion y awor nan ta busca ken pa culpa. Gobernacion no ta señala dede riba otro. Gobernacion ta tuma decision na bienestar di Aruba. Djis hisa benta baranca cera paso pa tur hende, no ta tuma decision drechi.
Mas di 500 dia sin un LIM nobo
Gobierno a critica e maneho anterior, pero Presupuesto 2027 ainda ta basa riba e Ley di Integracion Ministerial cu Gobierno Wever-Croes a laga atras. Despues di mas di 500 dia, AVP-FUTURO no a entrega un LIM nobo. Nan ta papia di cambio, di bolter cos, pero ta goberna cu e mesun instrumento cu nan mes a critica.
Tin placa pa inverti, pero Gobierno no por ehecuta
Na 2025 AVP-FUTURO a gaba cu tin un suma record di Afl. 74 miyon disponibel pa inversion, pero solamente Afl. 30 miyon a wordo ehecuta: 40%.
E problema no ta solamente falta di placa. E problema ta falta di direccion, capacidad y decision. Puntonan cu e minister di finansa ta nenga pa investiga y soluciona. Mas Gobierno tarda pa ehecuta, mas caminda, scol, edificio publico y otro facilidadnan ta sigui deteriora.
Hospital y AZV ta bou di presion
E siman aki Hospital ta alerta cu mas placa ta necesario, mientras e fondo di AZV ta enfrenta presion creciente. En bes di presenta un plan cla pa garantisa cu cuido medico ta keda pagabel y accesibel, Gobierno ta reacciona solamente ora problema ta explota. Cuido di salud no por wordo goberna cu improvisacion, mester tuma decision.
Nan kier entrega mas poder na Hulanda
Mientras AVP-FUTURO no por ehecuta su propio presupuesto y no ta fortifica control interno di Aruba, nan kier convence pueblo cu HOFA ta e solucion. Nan ta dispuesto pa entrega parti di Aruba su autonomia financiero, pasobra nan mes no tin confiansa den nan capacidad pa pone cas na orden. Solamente un Gobierno cu no por goberna, ta busca un otro pa goberna p’e.
Ora nan wordo confronta, nan ta culpa otro
Si un contract cuestionabel bira publico, nan ta culpa oposicion. Si un proceso keda pega, nan ta culpa Gobierno anterior. Si pueblo protesta, nan ta hunga victima. Si nan no tin contesta, nan ta ataca e persona cu haci e pregunta.
Poder ta bin cu responsabilidad
AVP-FUTURO a pidi e responsabilidad pa goberna. Nan a pidi voto di pueblo. Nan a priminti pa bolter cos y politica nobo. Anto awor nan ta nenga pa acepta cu poder ta bin cu responsabilidad.
Aruba no por sigui wordo goberna cu excuus, manipulacion y panico. Nos tin problema serio den salud, finansa publico, costo di bida, naturalesa, siguridad y funcionamento di Parlamento. E momentonan aki ta exigi liderazgo firme, transparencia y capacidad pa tuma decision.
Ken ta kere ainda den AVP-FUTURO?
AVP-FUTURO kier bende Pueblo cu nan a gana un eleccion, pero gana eleccion no ta mescos cu por goberna un pais.
E pregunta cu cada ciudadano mester haci awor ta: Despues di tur loke nos a mira, ainda tin hende cu ta kere cu AVP-FUTURO por goberna Aruba?
Aruba no mester mas excuus. Aruba mester un Gobierno cu por goberna.