Palabra tin poder, palabra ta cambia direccion di bida di hende, palabra ta trece bida, pero tambe por ocasiona morto spiritual y fisico, palabra por uni, palabra por trece por desunion, palabra por condena of palabra por libera, na bo forma di papia bo ta indentifica bo mes.
Hende mester tene masha bon cuenta kico nan ta papia , con nan ta papia, y na unda nan ta papia, pasobra cada palabra cu sali for di bo boca bo tin di duna cuenta un dia na Dios.
Tin hende cu prome cu nan cobra nan salario, ya nan a cuminsa declara cu e salario no ta yega, nan ta cobra un salario, pero cu nan boca nan ta yame onderstant, y asina bo mes boca ta stroba bo, pasobra bo no ta agradecido na Dios pa e forsa cu e a dunabo henter luna y awor bo por ricibi bo salario.
Tur locual nos ricibi cu un curazon ingrato,nos lo no disfruta di dje, pasobra bo palabra y bo pensamento nan ta hiba bo den e caminda di victoria of derota , pasobra manera un hende ta pensa di su mes asina e lo progresa.Cada palabra positivo ta un pilar pa bo bida, pero cada palabra negativo, ta coba un buraco pa bo mes.
No desea ni papia malo di otro hende , ni tampoco difama otro hende y kere cu ta bon bo ta haci , pasobra esey no ta cuadra cu boluntad di Dios, pasobra Dios ta yama nos pa stima otro.
Hopi biaha nos ta wak e hubentud y bisa cu nan comportacion ta motibo cu nan ta bini for di famia kibra, caminda ta falta tata of mama den cas.
Nos ta lubida cu hopi biaha, e muchanan aki ta bini for di famia completo, pero cu for di chiki nan a lanta mey mey di palabra negativo cu solamente ta herida, y cu nunca ta duna un aprecio.
Y esey ta trece rechaso y amargura for di chiki den curazon y bida di e mucha, y segun e ta bira grandi e ta cuminsa, expresa locual e a ricibi, pasobra palabra malo ta sembra maldad den curazon di hende.
Efesionan 4 vers 29 ta para scibi: No laga ningun palabra dañino sali for di boso boca, sino solamente palabra cu ta bon pa edificacion,conforme e necesidad di e momento, pa esaki por duna gracia na esnan cu ta tende.
Bo no por spera bon di un hende cu ta scucha malo so ta wordo papia tur dia, negativismo, vengansa, , bully, abuso, menosprecio , comdenacion, y nos como mayor mester tene cuenta cu esey.
No tin crecemento pa nos ora henter dia nos ta papia malo di nos prohimo, pesey nos ta mira cu hende cu ta papia malo di otro, no tin ningun logra pa nan mes, pasobra sin bo sa bo ta cerando porta pa bo mes.
Proverbionan capitulo 12 vers 18 ta para scirbi; Tin hende cu ta papia sin pensa, manera hinca di spada, ma lenga di hende sabi ta trece curamento.
Usa bo boca pa sana bo famia, pa oracion, pa bendicion, pa coreccion, pa disiplina, pa trece alegria den curazon di bo yiunan, pasobra palabra corecto ta duna curashi y ta sana curazon.
Bo no tin mester di ta un tata of mama miyonario pa bo lanta un famia, bendiciona, inteligente, integro , pero cu palabra nan di amor y sabiduria, bo ta lanta un imperio di bondad.