E influencia diabolico cu alcohol ta causa den bida di hende ta algo hopi desastroso, y no tin ningun otro forma di indentifica e asunto aki. Y no laga ningun hende hunga wise, pasobra ni droga ni alcohol no ta bon ni pa curpa, ni mente ni spirito di hende.
Dios no kier pa hende ta burachi, pasobra hende su Spirito mester ta “On Call” 24/7 pa Señor, un hende mester ta cla pa obedece Señor tur momento y ora un hende ta burachi, e no por para ni riba su pia, te pa e por obedece Dios.
Ora hende ta burachi mal spirito ta domina nan bida, tin mas cu 100 versiculo den bijbel cu ta avisa nos di esey, y no conta e avisonan medico cu ta wordo duna tur momento.
Un hende por halsa su bos y bisa, ningun hende no tin nada di bisami pasobra ta mi placa mi ta bebe, pero na final ta e mesun persona ey ta resulta como bobo, ora e ta tira boca abao riba suela y ta otronan tin cu yude lanta.E ta simplemente un actitud di bobedad.
Tin hopi hende ta surpasa tur limite di alcohol, den temporada , di carnaval, y nan no ta tene cuenta cu despues di e temporada aki e curpa ta sigi pidi, y sin bo realisa bo ta adicto na alcohol, y na un edad relativamente jong.
Hopi a perde trabao, pasobra empleo ta cos di respeta, y presenta na pia di trabao burachi, no ta algo cu ningun compania, decente ta permiti.
Hasta hende cu ta huramenta, ta corre e peliger di bay trabao bao di influencia di alcohol, pasobra alcohol ta engañoso, pesey e cantidad di AO den e sector ey ta sigi aumenta.
Alcohol y droga ta destructivo y mortal esey tur hende sa, tur ta caba cu mente, pulmon ,riñon y curason di hende y ta hiba hende santana.
Monton di hende a purba di caba cu alcihol y droga, pero na final ta alcohol y droga a caba cu nan.
Antes tabata un berguensa pa bo mira un muher burachi, pero awor aki hopi ta kere , cu esey ta e forma di modela, pasobra ora hende muher ta burachi bo por spera tur clase di disparate.
No wak biña ora cu e ta cora, ora cu e ta briya den copa,ora cu e ta baha suave asina,na final e ta morde, manera colebra y ta pica manera vibora. Bo wowonan lo mira cosnan straño, y bo curason lo expresa cosnan perverso.( Proverbionan 23:31-33).
Ta na unda a sali cu hende mester bebe asina tanto . Acaso tin un ley cu ta bisa cu hende mester bebe?
Si doño di trabao tabatin permiso pa un mashin di supla na trabao, hopi hende lo a perde un dia di trabao of mas , pasobra hopi tin e creencia cu trabao mester dimi, mi mester baha e colega for di warda, awel con cu mi yega , mi yega, awel e cos aki no ta bay dura hopi tempo mas pasobra buracheria a cohe direccion extremo.
Bibida sterki ta marga pa esnan cu ta bebe ( Isaias 24:9),
Hopi hende tin un corona orguyoso di buracheria, pero ta hopi a perde matrimonio, famia, keda invalido,causa daño na propiedad di otro, causa morto, perde trabao, perde integridad y decensia.
Hopi ta drumi burachi y lanta mainta y sigi bebe, pero corda cu e palabra di Dios ta bisa cu ningun burache lo no hereda e reino di Dios. ( Galationan 5:19-21).