Pasobra Dios no a destina nos pa furia ( destruccion) ma pa obtene salbacion , pa medio di nos Señor Hesus Cristo. Kende a muri pa nos,pa sea nos ta lanta of drumi,nos biba huntu cun’E . Pesey encurasha otro y edifica otro, mescos cu boso ta haciendo tambe. ( 1Thesalonisensenan 5:9+10).
Señor no ta tarda cu su promesa, manera algun tin esaki pa tardansa,ma e tin pasenshi pa cu boso,y no kier pa ningun hende bay perdi, ma pa tur bin na repentimento. ( 2 Pedro 3:9).
Tur hende ta na altura, cu nan por scohe: *Sea e caminda di bida eterna den Cristo Hesus, of e * Caminda di perdicion , cual ta morto eterno den fierno.
No tin excuus ta dos caminda tin y ta un bo por scohe, aki nan no tin wega of basila, pasobra den Cristo ,no tin politiek, ni tampoco tin gamblemento cu alma di hende, bo mester scohe seriamente pa Cristo ,pa asina bo alcansa bida eterna, pasobra bida eterna ta solamente den Cristo bo por hañe.
Cristo Hesus ta e unico mediador entre Dios y hende, tur hende cu kier yega serca Dios, mester pasa via di e porta y caminda cu yama Cristo Hesus y esaki ta sin excepcion, pasobra serca Dios no tin discriminacion, ni tampoco halsamento di hende of hende preferencial, ta nos tur ta pecador y nos mester di un Salbador, un Redentor y nos ta hañe den Cristo Hesus.
Segun e barco di mentira ta nabega tur caminda guia pa satanas y su demoñonan, hopi hende no ta nota con facilmente nan ta wordo hala den e caminda di scuridad y perdicion.
Pasobra tur esnan cu ta bay contra boluntad y principionan di Dios, ta bira tripulante di e barco, y e unico manera pa bandona e barco, ta di bini na careda na Cristo Hesus pa asina evita condenacion eterno. ( Juan 3:17+18).
Pasobra Dios a stima e mundo asina tanto, E a entrega su yiu unigenito pa ken cu kere den dj’E no bay perdi ma hanja bida eterna. Ken cu kere den Señor Hesus Cristo lo ricibi bida eterna.
Den Cristo Hesus tin salbacion y liberacion pa tur hende, e criminal, ladron,adultero, homosexual, lesbiana, tur tipo di genero, bendedo di droga, violador, pedofil etc.
Señor a bisa den su palabra bin serca Mi tur cu ta cansa y carga y lo Mi duna boso sosiego.( Mateo 11:28).
Te ainda tin hopi cu ta mara den scuridad, y cu no kier acepta e oferta milagroso aki di salbacion, nan ta rechasa Cristo Hesus, y awor tur esnan cu ta apoya hende den nan inmoralidad y pica cu ta hiba nan na condenacion, ta mesun cos cu e persona den inmoralidad y pica.( Romanonan 1: 32).
Pasobra si bo ta sconde wak polis pa duna un persona chens pa horta, bo ta mes ladron cune, cuanto mas ainda ora den bo sano huicio, bo ta apoya maldad y inmoralidad.
Un mayor cu ta sconde cosnan horta pa su yiu, ta mes ladron cu e yiu cu ta kibra drenta den cas di hende.Un mayor cu ta stima su yiu nunca por apoye den inmoralidad y maldad.
Pesey somete boso mes na Dios, resisti e diabel y e lo huy for di boso.
Hala serca Dios y E lo hala serca boso.
Limpia boso mannan boso pecadornan, y purifica boso curason , boso di curason dobbel.( Santiago 4:7+8).
Ta tempo pa tur hende realisa cu salbacion ta solamente den Cristo Hesus, no tin otro caminda, pasobra Cristo Hesus ta e caminda di e Berdad y Bida.