Den un evento ekspektakular e pelíkula PAS a wòrdu estrená dia 25 di novèmber 2023 na House of worship Hulanda. Despues di e estreno aki, hopi ta e persona nan ku tabata puntra unda por haña e pelíkula aki mira. E momentu a yega pa revelá ku den e próximo dia nan aki e pelíkula aki por wòrdu mirá na Caribbean Cinemas Curaçao aya na Sambil.
PAS ta un pelíkula kòrtiku, basá riba bida real, den kual Adino Koeiman ta kompartí un testimonio impreshonante.
Komo hóben Adino a lucha ku adikshon, droga, hòrtamentu, inmoralidat seksual, parandiamentu i problema ku lei. Pa hopi aña el a biba den skuridat huntu ku su ruman hòmber.
El a yega na un punto krusial den su bida kaminda e no tabata mira e salida mas i inesperadamente su bida ta kambia di skuridat pa lus i di intrankilidat pa PAS.
House of Worship Hulanda ta presentá e testimonio aki den forma di un pelíkula emoshonante. E pelíkula kòrtiku aki ta produsí pa Chesron Richardson i dirigí dor di Jermaël Lanoy. E elenko prinsipal yunan di Kòrsou, Kirsten Gabriel Maria, Clifton Hariquez i Erwinella Lichtenberg a demostrá di ta tremendo aktornan ku di un manera estupendo ta hibabo den e historia aki i den 40 minüt ta trese dilanti e mensahe prinsipal di e pelíkula aki, kual ta ‘PAS’.
E pelíkula aki ta na papiamentu, ku subtitulo na hulandes. E produktor di e pelilkula aki, Chesron Richardson ta deseá pa e mensahe aki yega na kada un di nos hoben/hoben adulto i nos adulto nan i ta konfia ku e mensage aki lo trese speransa. Sin importá den kua estado di bida bo ta, insiguridat, ansiedat i intrankilidat por wordu transformá den PAS.
House of worship Hulanda i pastornan Chesron i Juraima Richardson ta invitá mayornan, hoben nan, skolnan sekundario, instansha nan i e pueblo di Kòrsou kompleto pa bai wak e pelíkula inspirativo aki i risibí e mensage di speransa aki ku nos tur tin mester.
Keda pendiente di e pagina nan sosial di House of worship Hulanda (instagram, facebook i YouTube) pa asina bo keda informá di e fecha nan ku e pelíkula aki ta disponibel i pa kualkier pregunta pa ku e pelíkula aki.
