Mas ku 250 mucha di tres skol básiko na Boneiru a sera konosi ku musika klasiko di un manera úniko e siman aki. Pianista Alexander Kraft van Ermel a presenta un mini-konsierto na skol básiko Rayo di Solo, Kolegio Strea Briante i skol básiko Aquamarin, kaminda el a kombina musika klasiko ku un toke auténtiko di Karibe.
E konsiertonan a keda organisá den kolaborashon ku Classical Music Board Bonaire i programa di edukashon kultural EKADK(Edukashon Kultural Artistiko di Kalidat), E meta ta pa introdusí mucha ku un tipo di musika ku no ta tur ora presente riba Boneiru. Kraft van Ermel a logra kue atenshon di e muchanan di inmediato ku su manera fasil di presentá i su presentashon interaktivo.
“E muchanan tabata hopi entusiasmá i nan a skucha ku hopi atenshon,” segun un bosero di Classical Music Board. “Durante su presentashon, Alexander a bai den diálogo ku e muchanan, loke a baha hopi e barera pa haña apresio pa musika klasiko.”
Raís Karibe den muzik klasiko
Alexander Kraft van Ermel (1990) a biba na Kòrsou i a haña su prome les di piano di su mama i mas lat di su tawela, e komponista i pianista konosi Wim Statius Muller. E base Karibeño akí ta un liña prinsipal den su karèra musikal. Na edat di dieshete aña el a gana segundo premio den kompetensia “Scriabin na Paris”, kaminda presidente di jurado Mikhail Voskresensky a bisa: “such big music from such a small island.”
Kraft van Ermel a inkluí hopi komposishon klasiko antiano den su repertorio i resientemente a lansá e álbum Antillean Heritage komo un homènnage na su tawela. E kombinashon úniko di forma klasiko ku influhensia Karibense a hasi ku su konsiertonan na skol tabata un eksperensia kultural spesial pa e muchanan di Boneiru.
Edukashon kultural na Boneiru
E mini-konsiertonan ta parti di e programa mas amplio EKADK, ku ta enfoká riba edukashon kultural di kalidat pa mucha di skol básiko na Boneiru. E kolaborashon ku Classical Music Board, ta kontribui na e meta pa pone muchanan den kontakto ku diferente estilo di musika i ekspreshon kultural.
E reakshon positvo di tantu muchanan di skol komo dosente ta konfirma e importansia di inisiativanan manera esaki pa desaroyo kultural di e hoben Boneiriano.
