Grita “nos no ta entrega mas facil” ta un expresion facil pa grita. Pero e consecuencianan, e personanan aki lo ta cla pa carga? No entrega di e 12.6% di salario lo por nifica situacion precario di Aruba. Y despues di esaki Kico ta bay pasa?.
Esaki ta algo cu ningun hende ni ningun sindicato ta papia riba dje.
Sinembargo mester bisa si no ta tur sindicato ta malinforma nan miembronan, tin algun cu ta mira e realidad y e tempo duro cu Aruba ta pasando den dje y no ta haci wega cu esaki.
Na momento cu pandemia di COVID19 a yega Aruba, e situacion a mustra scur. Si no tabata pa e ayudo di Hulanda, no tabatin nada cu Aruba por a haci pa sobrevivi. Te dia di awe, ta depende pa un gran parti di e ayudo for di Hulanda. E no cumplimento di condicionnan poni door di Hulanda, ta nifica un paro na e ayudo aki cu tur su consecuencianan. E consecuencianan ta hopi mas grave di loke hopi ta pensa. Na e momentonan aki e isla no ta den un situacion di por bay para fuerte pa derecho di trahadonan publico, cual salario y subsidionan ta e post mas grandi den e gastonan.
Awe mainta por a scucha e presidente di SIMAR ta bisa e maestronan no ta entrega mas. E pregunta ta: a papia cu e miembronan kico esaki ta nifica, no pa e miembronan di SIMAR so pero pa henter Aruba? E miembronan di SIMAR ta na altura di e situacion di trahadonan di sector priva? No solamente hopi di nan te ainda no tin un salario normal manera antes. Nan a entrega mas cu 12.6%, mientras cu nan salario no t’asina bon ni tin e beneficionan cu esnan den sector gubernamental tin. Banda di esaki, tin otro grupo grandi cu no tin ni trabou ainda.
E posicion di exigi revoca e 12.6% lo mehora situacion di esnan den aparato gubernamental, pero lo horca sector priva, y cu ne un grupo grandi di trahado. Consecuentemente e consecuencia pa e ambtenaarnan lo bira pio. Ta sector priva ta percura pa un gran parti na caha di gobierno, cu ta paga salario di e miles di empleadonan publico. SIMAR ta consiente di esaki?
E situacion por tabata miho apesar di e pandemia su consecuencianan. Pero e ta hopi malo debi na e debe grandi cu e gobierno berde a hinca e pais aki den dje cu proyectonan cu a costa e generacion y futuro generacion masha hopi placa.
Pa sali di e situacion reinante na Aruba e ta exigi sacrificio, no solamente di sector priva pero tambe di e aparato gubernamental. E ta un situacion cu ta exigi solucion y complace cu sindicatonan no ta na beneficio di pais Aruba. E pandemia y su consecuencianan ta eynan y lo no disparce por arte di magia cu mañan lo tin un caha yena di placa. Si e gobierno aki dicidi di entrega y bay, e siguiente gobierno lo hay’e cu e mesun problema pasobra e caha magico yena cu placa no t’ey. Simplemente mester entrega pa salba Aruba pa e generacion aki y esun di futuro.
Gobierno apesar di e situacion dificil a haci un apelacion na Hulanda pa cuminsa baha loke mester corta na 50% den 2022 y na 2023 kit’e. Riba esaki no a haya un contesta ainda. Apesar di e solucion cu a trece riba mesa, sindicato SIMAR ta yama un manifestacion. Esaki ta algo cu ta mustra cu nan ta di mala fe. No ta spera e fecha di 26 di november pa haya contesta di Hulanda y ta core yama un Manifestacion. P’esey e pregunta ta keda: Kico tin tur tras di esaki? Pakico ta insisti riba un Manifestacion pa exigi algo cu por hiba Aruba na bancarota, mientras ta trahando riba algo pa mustra solidaridad cu ambtenaarnan?.
Ban uni pa hiba Aruba padilanti, nos tur ta forma parti di e progreso di nos Pais