Promé biaha den 15 aña ku James Finies ta konsehándo pueblo di Boneiru i su habitanten pa no bai bota den Elekshon Hulandes ku tur medionan di komunikashon grandi na Hulanda a rapòrta riba e yamada di Finies pa no bai vota komo protesta. Esaki ta un momento realmente histókriko.
Hopi hende na Hulanda no ta konsiente di e situashon real na Boneiru, pasobra e informashon ku yega na e públiko ta regularmente influensia òf filtra pa medionan di komunikashon ku ta serkamente liga ku gobièrnu Hulandes. A pesar di e logronan internashonal histókriko di James Finies i di e organisashon di Bonaire Human Rights — inkluso e presentashonan ku Finies a hasi na Nashonnan Uni i otro fòrum internashonal, kaminda e a eksponé e realidat di Boneiru despues di 10-10-10 — prènsa Hulandes a kontinuá ta ignorá e esfuersonan ey, lagando e públiko Hulandes sin informashon o malinforma di e lucha di Boneiru pa hustisia i autodeterminashon.
James Finies a deklara ku esaki ta un desaroyo positivo den media Hulandes. Mas ku dies di e medionan di komunikashon mas grandi na Hulanda — inkluso NOS 1, Nieuwsuur, De Telegraaf, Trouw, MSN, NPO, Nieuws.nl, EenVandaag, i hopi otro — a rapòrta riba e yamada i akshon di boikòt di James Finies na Boneiru, ku es biaha aki a logra titular nashonal den e notisianan primetime Hulandes. Otro momento histókriko pa Finies i Boneiru tabata ku ekspertonan legal i konstitushonal Hulandes a rekonosé públikamente ku e kampaña di “no vota” di James Finies tabata hustifiká, tumando na kuenta e subordinashon I inhustisia politiko ku Boneiru ta sufriendo na man di Den Haag desde 10-10-10.
E partisipashon abow di solo 21.5% den e elekshon parlamentario resien di Hulanda na Boneiru ta manda un mensahe kla I raspa di resistensia i malkontento. A pesar di preshon di partidonan lokal — MPB, DP, UPB i M21 — pa vota pa nan partido relashoná na Hulanda, pueblo a ninga di legitimá un sistema polítiko impone ku ta goberna nan desde 2010. Ta un sekreto publiko ku aparentemente e polítikonan i partidonan lokal aki ta risibí koperashon i insentivanan pa promové interesnan polítiko Hulandes durante elekshonnan na Boneiru — un práktika ku ta pone serio duda riba integridat, transparensia i e balornan demokrátiko. E silensio di pueblo Boneriano na e urnanan di votashon no tabata apatía, sino un akto deliberá di protesta — un posishon kontra hipokresia, frustashon kontra tanto lidernan lokal komo esnan Hulandes, i un demanda pa honestidat, responsabilisashon i representashon real.
Un artíkulo den prènsa Hulandes Dossier Koninkrijksrelaties NL mes a rapòrta: “Akshon di Boikòt di Finies na Boneiru ta duna dolor di kabes na Konseho Elektoral Hulandes.” E yamada di Finies pa boikòt elekshon parlamentario a tene e Konseho Elektoral Hulandes okupá despues ku a surgi sospecho di un eror den kontamentu di voto na urna di vota na Rincon. E porsentahe inusualmente haltu di 4.2% voto blanko a provoka un investigashon ofisial. Despues di un investigashon, a sali na kla ku James Finies, un figura lokal konosí, a hasi un yamada via medionan sosial pa hendenan no bai vota òf pa vota blanko. Na Rincon, kaminda ta biba prinsipalmente hendenan lokal, e yamada aki tabatin un impakto signifikante. Partisipashon di vota tabata partikularmente hopi bow, i esaki a kousa ku Konseho Elektoral Hulandes a retrasa e publikashon di e resultado final na Hulanda.
Pueblo di Boneiru a papia via su silensio — un akto poderoso di resistensia kontra inhustisia. James Finies i Bonaire Human Rights Organization (BHRO) ta kontinuá e yamada pa e re-inklushon di Boneiru komo un Teritorio Sin Propio Gobernashon di Nashonan Uni, pa garantisá protekshon i supervishon internashonal. Solamente ku berdat, respet i responsabilisashon por restourá demokrasia i dignidat real pa pueblo di Boneiru.