Parlamentario Dangui Oduber a expresa fuerte preocupacion riba e alto costo di bida na Aruba durante un conferencia di prensa, unda el a critica e maneho economico di gobierno AVP–FUTURO y, en particular, e actuacion di Minister di Finansas y Economia, Geoffrey Wever.
Segun Oduber, gobierno actual a hiba un campaña electoral cu promesanan claro pa mehora poder di compra, baha costo di bida, elimina pobresa y garantisa cu no lo tin inflacion. “Awe, despues di casi un aña di gobernacion, e realidad ta totalmente diferente,” el a declara.
Oduber a recorda cu Minister Wever anteriormente a expresa cu e frigidairenan na Aruba tabata bashi y cu lo e percura yena nan atrobe mediante un maneho responsabel di finansas y economia. Sinembargo, segun e parlamentario, e situacion actual ta mustra cu e prioridad di gobierno no ta cu consumidor, sino cu comerciante.
“El pueblo ta mira cu tur dia e prijsnan di cuminda ta subi,” Oduber a bisa. El a menciona cu durante aña pasa, rond di temporada di Pasco, gobierno a aumenta e prijs di gasolin y diesel, y cu aña aki a cuminsa cu un aumento adicional den prijs di pan.
Segun Oduber, riba medio social nan por observa cu recientemente un pan blanco kipashi a subi te fl. 8,75 na un supermercado, mientras cu na otro supermercado e aumento tabata di fl. 6,50 pa 7.50 pa pan. “Esaki ta un carga grandi riba familia Arubano,” el a agrega.
El a reconoci cu gobierno a tuma medida pa mehora e poder di compra di pensionadonan, algo cu el a considera corecto. Sinembargo, el a enfatisa cu Aruba no ta compone solamente di pensionadonan. “Tin un grupo grandi di trahadonan y familia den e clase media cu ta lucha pa sobrevivi,” Oduber a subraya.
Oduber a menciona cu durante gobernacion di MEP, e ingreso di pensionadonan a wordo aumenta cu fl. 400, pero el a critica cu gobierno actual ta lubida riba otro segmento di comunidad cu tambe ta enfrenta presion economico.
El a referi tambe na investigacion di Banco Central di Aruba, cu a conclui cu e clase media ta gradualmente desapareciendo, principalmente como consecuencia di e alto costo di bida y e debilitacion di poder di compra. Investigacion di CBS tambe a indica cu tanto cuminda prepara na cas como cuminda compra pafo di cas a bira practicamente impagabel pa hopi hende.
“Aunque gobierno ta papia di deflacion, pueblo ta sinti inflacion tur dia den nan cartera,” Oduber a afirma. Segun dato di Banco Central, 88% di respondientenan a indica cu nan poder di compra a bay atras.
Despues di 11 luna di gobernacion di AVP–FUTURO, Oduber a conclui cu e promesanan electoral no a wordo cumpli. “Gobierno a priminti cu pueblo lo tin mas placa den nan cartera y cu costo di bida lo baha, pero realidad ta mustra loke contrario,” el a bisa.
Finalmente, Oduber a critica cu Minister Wever ta actua mas como un minister–comerciante, impulsando iniciativanan fiscal pa beneficia comerciante, mientras cu e “hende chikito” ta keda atras sin alivio real riba salario y prijsnan. “Gobierno mester para pa e pueblo prome, no pa interesnan comercial,” Oduber a conclui.