Parlamentario Dangui Oduber a expresa fuerte critica contra Minister di Finansas y Economia, Geoffrey Wever, pa loke el a describi como un actuacion contrario na principio basico di gobernacion y respet institucional. Segun Oduber, e minister a anuncia iniciativanan fiscal sin informa ni consulta previamente cu Parlamento di Aruba.
Oduber a lamenta cu Minister Wever, cu ta un abogado di formacion, “ta actua contra di tur regla y principio politico,” pasobra Parlamento ta e organo di mas halto di Pais Aruba y e autoridad cu, segun ley, mester wordo informa y consulta prome cu implementacion di cambionan di politica fiscal pa pueblo.
Segun Oduber, durante aña pasa, Minister Wever ya a introduci cambionan fiscal via Landscourant, sin notificacion formal na Parlamento. Recientemente, riba 12 di januari, e minister a anuncia durante un conferencia di prensa varios iniciativanan fiscal, pa despues comparece den Parlamento durante un openbare bijeenkomst pa informa e organo legislativo di decisionnan cu ya tabata tuma y parlamento no por haci cambio mas.
“Esaki ta un manera di goberna cu no ta respeta e rol di Parlamento,” Oduber a declara. El a agrega cu e metodo aki crea un precedente peligroso den gobernacion di Pais Aruba.
E parlamentario a compara e actuacion di Minister Wever cu e di Minister Gerlien Croes, describiendo nan actitud como “autoritario” y carente di respet pa proceso democratico y pueblo di Aruba. Segun Oduber, nan ta actua sin consulta y sin transparencia, imponiendo decisionnan sin e debido proceso.
Oduber a expresa preocupacion tambe riba loke el a yama un contradiccion fundamental den discurso politico di partido FUTURO. “Nan a priminti un politica moderno, transparente y participativo, pero den practica ta haci net lo contrario,” el a afirma.
Segun Oduber, e falta di comunicacion y consulta cu Parlamento ta socava e principio di separacion di poder y ta crea un clima di desconfianza institucional. El a conclui cu e situacion aki mester wordo coregi, y cu gobierno mester bolbe respeta e caminda democratico y legal pa introduci reforma fiscal, locual cu minister wever no ta haci.