Dos luna a pasa y ainda Vice Prome Minister di Pais Aruba, Gerlien Croes, no a duna claridad riba su biahe den un avion priva cu e la bay corsou pa viahe di trabou. Parlamento, tambe e comunidad, ta sigui sin presupuesta riba e asunto aki.
Parlamentario di Movimiento Electoral di Pueblo (MEP), Dangui Oduber, a indica cu ora gobierno ta papia di honestidad, transparencia y progreso pa tur, no tin rason pa core ni pa sconde informacion. Segun Oduber, fraccion di MEP no ta haciendo acusacion, sino ta cumpli cu su responsabilidad como representante di pueblo: exigi informacion pa e berdad sali na cla y pa percura cu tur accion di gobierno ta cana segun ley.
Segun Oduber Landsverordening Openbaarheid van Bestuur (LOB),ta un ley cu ta obliga gobierno pa comparti informacion oficial cu ciudadano. E ley aki ta duna pueblo e derecho di pidi y ricibi claridad riba decisionnan y gastonan di gobierno. Den e caso aki, LOB a wordo uza pa obtene informacion riba e biahe priva di Vice Primer Ministro Gerlien Croes pa Corsou.
A pesar cu minister a describi e asunto como algo “simpel”, dos luna despues ainda no tin respuesta oficial. Segun Oduber, pa prome biaha den historia di Aruba, un minister ta demostrando un nivel di falta di transparencia cu ta preocupa.
MEP ta haci tres pregunta fundamental cu pueblo ta sperando respuesta riba nan:
- Ken a paga e biahe priva?
- Ki dia a paga e biahe priva?
- Cuanto a wordo paga pa e biahe priva?
Oduber a declara cu fraccion di MEP no ta busca speculacion, pero si prueba. Si e minister a paga e biahe di su propio saco, manera a wordo declara anteriormente, segun Oduber e comprobantenan mester ta disponibel y por wordo presenta sin retraso.
MEP a reafirma cu nan ta para pa transparencia, pa informa pueblo di Aruba y pa garantisa cu cosnan ta haci de manera corecto y conforme cu ley. Segun Oduber, un minister ta ocupa un funcion publico y ta obliga pa duna cuenta na parlamento y na pueblo di Aruba, cu ta paga su salario y cu a duna su voto di confianza.
MEP ta considera e silencio, e actitud y e falta di respet pa parlamento y comunidad como inaceptabel, y ta enfatisa cu transparencia no ta opcional, sino un obligacion fundamental den un democracia y cu e minister mester cumpli cu ne,
ignora y uza un postura cu no ta worry cu nada y ta haci loke kier , ta papia hopi di e arogancia y e mal genio y manera di minister Gerlien Croes cu no ta apto pa representa y ricibi confiansa di pueblo di Aruba den ningun circunstancia.
