Konseho Sosial Ekonomiko (SER) a entregá djaluna último su konseho
na Willemstad / Zwolle, 8 di yanüari 2026 — E Konseho Ekonómiko i Sosial (SER) di Overijssel (Hulanda) a
manda su sosten na SER di Kòrsou den un karta fechá 6 di yanüari 2026. Den e karta akí, SER Overijssel ta
hasi referensia na e insertidumbre kresiente den region, relashoná ku akontesimientonan na i rondó di
Venezuela.
Den e mesun mensahe, e konseho di Hulanda ta pone énfasis riba solidaridat ku su counterpart karibeño i ta
resumí tur den un frase: “Boso no ta so”.
E karta, firmá pa Frank Oostdam, presidente di SER Overijssel, i Ingrid Oonk, sekretario-direktor, ta indiká ku
periodonan di instabilidat por pone mas preshon riba institushonnan enkargá ku duna konseho i ku ta sirbi
komo brug entre partnernan sosial. SER Overijssel ta deseá su koleganan na Kòrsou “forsa, sabiduria i sosten
mútuo”, i ta ekspresá speransa ku trankilidat lo bolbe pronto pa asina por sigui ku e trabou pa promové
prosperidat i un repartishon mas ekilibrá di bienestar na e isla.
SER di Kòrsou a respondé dia 7 di yanüari último ku un karta di agradesimentu. Den su kontesta, e konseho ta
ekspresá “su apresio pe atenshon i e sosten risibí”, i ta suprayá ku, presisamente ora tin insertidumbre
internashonal i regional, ta esensial pa mantené un aserkamentu trankil, basá riba echonnan i ekilibrio, pa
sostené trankilidat sosial i konfiansa di públiko den institushonnan. Den kuadro di su mandato legal, SER
Kòrsou ta reafirmá su kompromiso ku diálogo sosial konstruktivo i ku rekomendashonnan ophetivo, ku ta dirigí
riba stabilidat, koheshon sosial i resiliensia ekonómiko.
E dos entidatnan ta indiká ku nan ke keda den kontakto estrecho ku otro i profundisá interkambio di
eksperensia riba areanan di interes komun, i riba e forma kon órganonan konsultivo por sigui kumpli ku efikasia
ku nan ròl di sigui konektá interesnan divergente, segun sirkumstansia ta pèrmití.
Overijssel ta manda sosten na SER Kòrsou:
