Dokter John Croes, un medico Arubiano cu ta gosa di amplio reconocimento internacional, recientemente a wordo sorprendi na su consultorio na Madiki door di un gesto di aprecio di un pashent cu a bin den nomber di su henter famia. E gesto tabata destina pa reconoci no solamente su trabou como medico, sino tambe su rol como consehero medico pa generacionnan di famianan.
Pa Dokter Croes, e momento a wordo ricibi cu sorpresa y profundo gradicimento. a traves di e añanan, e a nota cu cada biaha mas pashent ta expresa apreciacion pa e atencion medico cu e a brinda na Aruba. No obstante, fuera di pais su trabou ta wordo reconoci na nivel mas halto, principalmente na Europa, unda e ta wordo elogia como embahador medico pa Sur America, America Central y region di Caribe.
Dokter Croes a indica cu nunca a busca reconocimento ni fama personal, ya cu semper a kere den humildad y den pone e pashent central. Sinembargo, e a expresa cu a yega un momento unda e titulo cu a wordo otorga internacionalmente por wordo utilisa pa contribui activamente na desaroyo di cuido di salud na Aruba.
Mirando pa aña 2026, Dokter Croes ta optimista y ta manifesta su deseo di haci mas pa e comunidad local. Segun Croes, e ta sinti cu tin e energia y capacidad pa sigui eherce su profesion pa mas di 20 aña adicional.
E titulo di Embajador Medico a wordo conferí door di un profesor Spaño reconoci den campo di medicina integrativo, un disciplina cu combina varios rama di medicina y cu poco profecionalistanan por domina. Durante un congreso internacional cu a wordo celebra cu participacion exclusivo di specialistanan, Dokter Croes a asisti pa profundisa su conocemento. No obstante, un evento inespera a pone e medico Arubiano den centro di atencion.
Despues cu un cardiologo for di Africa no a logra durante e congreso, Dokter Croes a wordo invita pa duna un presentacion. Durante su presentacion, e a comparti un investigacion propio di “Kico ta causa cu pashent ta muri durante oranan di anochi”, unda a splica e proceso biologico y kimico cu ta tuma luga den curpa humano durante anochi. E presentacion a causa gran impresion entre e specialistanan presente.
Segun informacion comparti, e auditorio a reconoci cu Dokter Croes no ta solamente un medico general, sino cu su nivel di conocemento ta comparabel cu esun di un specialista. Como resultado, Croes a wordo oficialmente nombra Embahador Medico pa Sur America, America Central y e Caribe. E reconocimento a wordo acompaña door di un ceremonia formal, un cena di honor y un carta oficial cu ta facilita cooperacion medico internacional.
A pesar di su reconocimento global, Dokter Croes ta permanece comprometi cu su pueblo. Actualmente e ta traha riba plan nan ambicioso pa e futuro di cuido medico na Aruba. Segun Croes, tin posibilidad concreto pa desaroya infrastructura hospitalario moderno, incluyendo un hospital basa riba inteligencia artificial, Quantum Medicine, cu tecnologia robotico. Segun e vision, esaki lo permiti Aruba realisa procedemento avansa manera transplante di curason y crea su propio banco di stem cell.
Dokter Croes a enfatisa cu e recurso financiero pa iniciativa asina ya ta disponibel, pero cu ta rekeri boluntad politico pa haci e proyecto realidad.
Finalmente, Dokter Croes a expresa su gradicimento profundo na su pashentnan, cu ta sigui confia y aprecia su trabou. E a reconoci cu tin descontento den comunidad riba sistema medico na Aruba, particularmente riba trato di pashent, pero a señala cu solucion ta naci for di un enfoke medico mas profundo y humano.
Segun Dokter Croes, cuido di salud no ta limita na trata sintomanan, sino na examina e persona completo. E ta boga pa un cambio for di medicina puramente convencional pa medicina funcional y precision medicine, un direccion cu, segun Croes, ta representa e futuro di cuido di salud a nivel mundial.
A pesar cu e enfoke aki ta wordo amplia adopta y elogia na Europa, Dokter Croes ta lamenta cu na Aruba e modelo ainda no ta wordo plenamente comprendí ni acepta. Sinembargo, e ta confia cu e generacionnan futuro lo sigui e rumbo cu mundo medico ta tuma.