Un situacion peligroso a wordo reporta durante un evento di natacion den lama, ora un yate a drenta un area caminda tabatin landadonan, kayak y boei di señalashon presente.
Segun testigonan, e yate, identifica como Midnight Sun, a drenta e zona na un balor considera halto, loke a crea un situacion di riesgo pa participante nan den awa. Hendenan presente a indica cu, como capitan, lo tabata spera cu e embarcacion lo baha velocidad y tuma e precaucion nan necesario ora ta pasa cerca di un evento maritimo organisa.
Testigonan a expresa cu e situacion tabata cerca di termina den un accidente grave, ya cu un di e landadonan por a wordo afecta directamente pa e trayecto di e yate.
Miembronan di e team di Open Water, cu tabata presente pa coordina y garantisa siguridad durante e evento, a acerca e capitan pa splica cu tabatin un evento na progreso. Segun testigonan, e reaccion di e capitan a wordo considera inapropia y defensivo.
Un grupo di mayor presente na e evento a mustra desaprobacion cla riba e manera cu e situacion a wordo maneha. Comportacion iresponsabel riba lama no solamente pone bida na peligro, pero tambe ta manda un mensahe negativo na comunidad, specialmente na hobennan.
E comunidad maritimo ta recorda cu respet pa señalashonnan, baha velocidad cerca di landadonan y colaboracion cu organisadonan di evento ta fundamental pa preveni accidentenan y mantene lama un luga sigur pa tur hende.
Autoridadnan ta wordo encurasha pa sigui reforsa medidanan di control y conscientisacion riba siguridad maritimo riba isla.