Directora a.i. di Arubahuis drs. Glenda Hernandez y hurista di Arubahuis mr. Shandra John a duna un presentacion na e grupo di les “Minor Koninkrijkszaken” na Haagse Hogeschool.
E presentacion a cuminsa cu un introduccion di Shandra John di Aruba unda a papia entre otro riba con grandi e isla ta, clima, populacion, idioma, GDP, sistema di gobernacion y sistema hudicial. Tambe a duna un splicacion di e posicion di Aruba den Reino, cu a cuminsa cu un propio representacion na 1983. Na aña 1986 Aruba a haya su Status Aparte y asina e representacion a bira oficial Gabinete di Minister Plenipotenciario di Aruba, cu den boca di pueblo ta wordo yama Arubahuis. E fecha di 10 di October 2010 e pais Antia Hulandes a keda desvolvi, unda e islanan Curaçao y St. Maarten a bira pais autonomo den Reino y e islanan Boneiro, St. Eustatius y Saba a haya e status di “openbaar lichaam”.
