Durante wikènt tras di lomba, e Direktorado di Kontrol di Riesgo i Maneho pa Kalamidat di Gobièrnu di Kòrsou (DRR) a tene un simulashon di kalamidat pa asina organisashonnan ku ta forma parti di e Tim di Kalamidat di Kòrsou por a repasá e akshonnan den evento di kualke situashon di krísis òf kalamidat ku por presentá. Durante e okashon, 23 boluntario nobo di e Sentro di Krísis (Centraal Operationeel Coördinatie Centrum Curaçao/ COC3) a finalisá nan kurso i risibí nan sertifikado pa asina tambe forma parti di e organisashon akí komo boluntarionan nobo den Kòrsou su Sentro di Krísis (Vrijwillig Crisiscentrum Assistent).
For di aña pasá, DRR a inisiá e trayekto pa reklutá i prepará un grupo di boluntario nobo pa e Sentro di Krísis. E boluntarionan akí a bin ta sigui diferente kurso tantu teorétiko komo práktiko den entre otro leinan spesífiko ku por usa pa dekretá un kalamidat na Kòrsou, siña konosé Kòrsou su Organisashon pa Kontrol di Desaster, Profil di Riesgo di Kòrsou i e Sentro di Krísis. Huntu ku e simulashon, ku tabata nan èksamen práktiko, e boluntarionan nobo di e Sentro di Krísis a pasa tambe un èksamen teorétiko riba e diferente temanan.
Un total di 87% di e boluntarionan akí ta empleadonan públiko ku diariamente ta laborá den e diferente ministerio gubernamental. Huntu ku e boluntarionan nobo, algun di e èks boluntarionan di e Sentro di Krísis tambe a skohe pa kontinuá den e organisashon.
Modernisashon di e Sentro di Krísis, a pone un lus positivo tambe riba e grupo di promé boluntarionan ku a aportá di nan tempu i konosementu den e sentro di kordinashon pa kalamidat ‘Emergency Operation Center’ (E.O.C.) di Kòrsou. E promé grupo di boluntario akí, tambe a risibí un sertifikado komo un muestra di apresio i gratitut di parti di e Direktorado pa e gran trabou ku nan a desplegá boluntariamente durante tur e añanan tras di lomba den kualke situashon di krísis òf kalamidat ku por a presentá. Ku e sertifikado akí, e Direktorado di Kontrol di Riesgo i Maneho pa Kalamidat kier yama un danki di kurason na kada un di e promé boluntarionan akí pa yuda salbaguardiá bida di hende, bestia i vienes vital di Kòrsou.
