Na Boneiru a presentá resultado di e enkuesta riba nesesidatnan di trahadónan den prensa riba islanan BES. E seshon, organisá pa RCN/OCW, a tuma lugá den un sala na Plaza Resort Bonaire. Despues di e presentashon ku tabata na enkargo di Renske Pin, e miembronan di prensa ku tabata presente a partisipá den un tanda di debate riba e pregunta kon lo por fortalesé e panorama mediátiko riba e islanan BES. Miembronan di prensa na Saba i Statia por a sigui henter e aktividat bibu i dirèkt via streaming.
Entre 4 di mei i 1 di yüni un total di 33 trahadó den prensa ku ta biba i/òf traha riba islanan BES a partisipá den e enkuesta. E resultado ta duna un bon bista di e profil di e sektor, e kondishonnan laboral, e práktika periodístiko riba islanan BES, p.eh. e independensia editorial ku e trahadó ta eksperensiá, (outo) sensura, siguridat i akseso na informashon, deseonan pa profeshonalisashon i oportunidatnan pa kapasitashon.
Solamente 15% di esnan ku a tuma parti na e enkuesta ta di opinion ku prensa ria islanan BES ta kumpli bon ku e papel di “watchdog” (funshon di kontròl). Un 73% a indiká di ta deseá di mira un fondo di insentivo pa prensa (finansiamentu pa, por ehèmpel, proyektonan inovativo pa periodismo, oportunidatnan di formashon, alfabetisashon mediátiko, beka pa hóbennan talentoso, etc.). Riba e pregunta kon por fortalesé prensa riba islanan BES, esnan ku a tuma parti na e enkuesta a enfatisá e importansia di transparensia di parti di gobièrnu, posibilidat di edukashon pa trahadónan den prensa i mehor kondishon di trabou, prinsipalmente salario.
“Realmente nos ta apresiá e numeroso i ekstenso reakshonnan riba e enkuesta. Aporte di e miembronan di prensa ta sumamente valioso pa e próksimo pasonan. Loke nos ta mira, meskos ku den otro komunidatnan chikitu, ta ku periodismo independiente ta bou di preshon di influensha di polítika i komersio, loke ta kondusí na outosensura. Enfoká riba union den asosiashonnan di periodista òf amplia oportunidatnan di outoregulashon i kapasitashon, pero tambe traha riba sabiduria mediátiko di e públiko, por yuda den situashonnan asinaki”, asina e investigadó di prensa Renske Pin ta splika.
E investigashon ta tumando lugá na nòmber di Ministerio di Edukashon, Kultura i Siensia di Hulanda (OCW). Ophetivo di e investigashon tabata pa optené informashon balioso tokante e trabou, e nesesidatnan i konseho di e trahadónan di medionan di komunikashon pa fortalesé e panorama di medionan di komunikashon riba islanan BES. Ku e resultado, Ministerio di OCW por yuda organisá por ehèmpel kursonan di formashon i un fondo di insentivo pa periodismo.
E enkuesta ta parti di un proseso mas ekstenso, den kua lo hasi uzo di Indikadónan di Desaroyo di Medionan di Komunikashon di UNESCO pa realisá un bista di e panorama mediátiko di e islanan BES. Huntu ku e resultadonan di e enkueste i e seshon di konsulta ku miembronan di prensa, esaki lo sirbi komo input pa desaroyo i implementashon di un Plan di Desaroyo pa Medionan di Komunikashon i un programa di kapasitashon i otro posibel fasilidatnan pa fortalesé e panorama di prensa.
1 comment