Diabierna 7 di maart 2025 Fraccion di MEP a entrega un carta oficial na Gobernador di
Aruba pa trata nos preocupacion encuanto e manera con Presidente di Parlamento sra.
Gerlien Croes a bin ta dirigi reunionnan den sala di Parlamento. Esaki despues cu el a schors
e reunion di tratamento di presupuesto di pais Aruba dictatorialemente despues cu porfin
esaki a keda yama.
Despues di a tuma nota di reaccion di sra. Croes ayera, 10 di maart 2025, den prensa
encuanto nos carta y scuch’e papia encuanto e reunion di dia 7 di maart 2025, ta imposibel pa
keda sin reacciona.
Segun Gerlien Croes nos reaccion a bin cu vertraging y cu el a haya esaki hopi laat. Segun su
persona nos a haci recapacitacion politico durante weekend y a entrega e carta ayera dialuna
10 di maart 2025. Lo ta bon pa e tuma nota di e stempel riba e carta cu nos a manda y cu a
keda ricibi pa Gobernador. E stempel riba e copia cu nos a entrega na Gobernador ta bisa
duidelijk in ontvangst genomen 7 mar 2025 Kabinet van de Gouverneur van Aruba. Mesun
dia cu e reunion publico a tuma lugar y no dia 10 di maart 2025 manera sra. Croes ta insinua.
Lo ta bon pa nos informa pueblo cu enberdad sra. Gerlien Croes durante e reunion di dia 7 di
maart no sa nada di loke MEP a haci y bisa pasobra el a hunga ciego y sordo pa loke ta trata
nos Fraccion. Cumpliendo cu su plan cu AVP, despues cu Mike Eman a lesa e famoso
amienda, el a dicidi di schors reunion mirando cu e amienda ta cambia e esencia di e
presupuesto presenta pa Gabinete Wever-Croes y cu e ta bay manda esaki pa haya conseho di
CAFT y Raad van Advies. Mirando cu e tabata “sordo y ciego” pa Fraccion di MEP, e no a
scucha e grito di nos Lider di Fraccion pa un punto di ordo prome cu el a anuncia cu e ta bay
schors e reunion y tampoco a mira e mannan pidiendo atencion. El a anuncia schorsing y haci
manera nada un pasa. Contento sigur nos Fraccion no tabata ta y nos a bis’e algun frase
duidelijk al respecto pero awor e kier haci manera e no a scuchanan.
Sigur e 12 parlamentarionan cu a firma e amienda no tin nada en contra pa bisa, pero
lastimamente usando dictadura y haciendo mal uzo di su poder sra. Gerlien Croes a schors e
reunion sin tabatin e decensia di puntra e demas 9 miembronan di Parlamento pa nan opinion
y a kita nan oportunidad pa papia (presenta mocion of amienda). Achteraf e kier chercha y
bisa hasta cu e ta sorpresa cu ningun otro amienda a keda entrega e mainta aki. Ta con
hipocrita bo por ta? Ningun hende mas cu excepcion di Mike Eman a keda duna e
oportunidad pa papia y bo a schors e reunion sin tene cuenta cu sprekerslijst, peticion pa
punto di ordo y opinion di fraccionnan den oposicion.
Tanto sra. Croes tabata canta y toca bunita durante 3 aña encuanto democracia, transparencia
y dictadura, awe nos ta wak cu e ta kibrando tur nota y instrument. Esaki sigur no na
bienestar general.
Necesidad di trata y aproba presupuesto di pais Aruba ta uno serio. Ta importante y urgente
pa duna presupuesto 2025 nos aprobacion pa asina empodera gobierno pa por cumpli cu e.o.,
nos obligacionnan financiero, sigui haci inversionnan necesario y sigui brinda pueblo e
servicionnan necesario. Innecesariamente ta sigui (!) tranca e proceso pasobra realidad ta cu
nos por a trata e presupuesto y aproba esaki y asina nan ta den gobierno, na un manera
responsabel, ta presenta e voorjaarsnota acompaña pa e cambionan necesario den
presupuesto.