Den henter e situaciona cu a keda haci y e MB nan riba maneho di minister Ursell Arends , e realidad ta cu parlamento no tabata informa di cambionan of MB nan cu minister a presenta. Aunke cu minister ta bisa cu parlamento a aproba un mocion, pero ningun di e puntonan di e mocion tin di haber cu loke minister a implementa den e MB nan abrupto, aki ta caminda minister Ursell Arends a gaña riba su hefe cu ta parlamento.
Loke cu parlamento tabata informa di dje ta di un DRAFT di e maneho cu minister Ursell Arends tabatin pensa na december aña pasa, aki par di luna e ta un pensamento di 1 aña pasa. Sinembargo cambionan di ley of e ley mes y MB presenta parlamento nunca a ricibi nada.
Decision di minister Ursell Arends ta un decision mal tuma y abrupto y no ta den un termino rasonabel. Banda di esaki e realidad ta cu minister tin e derecho di trece e cambio, pero mester trece e cambio den un tempo rasonabel. Sinembargo loke cu e mandatario a haci ta trece un cambio den un tempo cu no ta rasonabel cu ta 1 di september di un MB cu ya caba a cambia un biaha.
Sinembargo pa por cambia un MB no por dies cambia esaki di awe pa mañan e tin un proceso pa cana unda cu aki tampoco Minister Ursell Arends no ta canando e caminda corecto. E prome ta cu minister mester comunica cu parlamento y sa si parlamento ta para su tras y dos si ta trece cambionan cu ta bay contra of desbentaha di e stakeholdersnan mester tin e ley cla y mas ainda mester tin sosten di parlamento pa cu e cambio cu ta keda presenta. Sinembargo den e cambionan cu e mandatario a haci e proceso tabata completamente robes.
Pa di prome minister no a avisa parlamento cu e ta bin cu e MB nan, di dos minister no a entrega ningun ley na parlamento y parlamento no sa mes kico ta para den e cambio di ley dus aki por mira cu e proceso riba su mes tabata completamente robes.
Sinembargo Minister a indica cu den e prome MB e ta aumenta e capacidad di pasahero di 5 pa 7 sin consulta cu e taxistanan , pero na momento cu parlamento a sinta cu e taxistanan por a compronde cu e taxistanan ta contra di esaki debi cu e taxistanan no ta haya seguro paso seguro no ta cera un seguro cu e taxistanan na 7 pasahero paso no tin un ley pa esaki y seguro no ta traha contra di ley.
Na momento cu minister Ursell Arends ta pone un MB cu ta obliga un taxista di 5 pa 7 pasahero por bisa cu dos pasahero ta coriendo den un taxi sin cu ta sigura. Si algo mester pasa cu e taxi ey y e tin 7 pasahero ta problema so lo haya su mes aden. Aki por mira claramente cu tin un decision y aspecto cu ta hopi robes cu minister Ursell Arends a tuma sin tene cuenta.
Lamentabel ta cu mirando cu e MB no ta corecto y e mandatario ta pone e taxistanan haci algo contra di ley y cu e no kier kita e MB ta bin cu un pensamento cu e MB ta keda cambia pa no obliga e taxistanan bay di 5 pa 7 pero si nan ta DESEA di haci esaki.
Ki manera di maneha e situacion aki ta ? Un berguensa total, dies pa mustra cu no ta kita e MB y acepta e fout pa no perde cara ta bin cu un cambio fofo y laga e decision na e taxista si e ta desea di core 7 turista pa e keda na un decision di e taxista siendo cu e minister sa y ta consciente cu e taxista lo haci algo contra di ley paso ley ta bisa 5.
Ki manera di pensa y maneha pais Aruba esaki ta ? Awo mirando esaki parlamento no a tik e mandatario riba su dede di e forma aki di maneha? Of parlamento ta dies ya ok e ta bon ?
Pa loke ta trata MB numero 2 ta bisa cu no por traspasa e permiso MAS, e MB aki cu minister Ursell Arends a bin cu ne ta bay contra di ley actual cu taxistanan tambe a pidi pa minister revoca e MB aki. Sinembargo e minister ta keda cabes duro y ta mustra cu no ta kita e MB.
E ley actual ta bisa den articulo 15 bo por traspasa bo permiso solamente si e cabes di cas cu ta core taxi cu ta e entrada principal ta bin por medio di dje, si e fayece of bira malo e ora ey solamente bou di e circunstancia ey permiso por wordo pasa pa un otro miembro den e famia cu ta biba den e cas.
E ley ta bisa den e articulo 15 eingelijk tur otro manera pafo di fayecimento of un malesa cu ta asina pisa cu e persona cu ta core taxi no por core taxi mas , tur otro manera pa un permiso por keda traspasa ta ilegal.
E situacion aki no ta algo nobo e persona cu a traha e ley na aña 1995 a mira cu e situacionnan aki ta posibel,a mira cu porta un tata of un mama cu ta cabes di famia cu ta core taxi y si e fayece con lo bay para cu su famia, asina e ley ta poni cu asina e miembro di famia por tuma e permiso y sigui percura pa e famia por keda drey economicamente y e placa por keda drey den e cas. Si mester mira bon e ley riba su mes ta humanamente bon poni den otro.
Mirando esaki si tin taxista ta abusa y ta bay contra di nan permiso di taxi mester atende cu nan mesora, den e caso aki ken mester atende cu nan ? E director y of comision existente, pero nan ta traha realmente ? sinembargo e ley ta bisa cu e minister concerni ta esun cu ta dicidi si e ta pasa e permiso pa un otro taxista si of no, pero ken su tarea esaki ta pa conseha minister ? no ta e director y of comision existente ?
Na momento cu e taxista ta haci e peticion y e persona cu ta cabes di cas cu ta doño di e permiso ta na bida ainda y no tin un malesa segun dokternan y ta bisa e no por sigui traha , aki automaticamente abase di ley e minister no por firma paso e traspaso tuma luga e ta contra di ley.
Dadocaso cu e minister firma tog e ora ey ta e minister ta esun cu tin cu carga e responsabilidad. Den henter e situacion aki loke cu ta un realidad ta cu e ley ta bon, ta solamente tanto e director, minister y e taxista mester respeta e ley y cana abase di ley y no lo tin ningun problema, pero aparentemente no kier haci esaki y awo ta buscando manera pa konkel e ley. Na beneficio di ken ?
E ley manera cu e ta na e momento nan aki no ta permiti bendemento di permiso, no ta permiti traspaso fuera cu bo muri of fuera cu bo bira hopi malo y no por traha mas y bo ta e cabes di cas cu ta trece placa. Tambe e ley na e momentonan aki ta bisa cu ta e minister so ta esun cu por firma y traspasa e permiso. Esaki kiermen cu si tur hende cana manera mester cana no tin ningun problema, pero awor si na e momentonan aki tin algo cu ta pasando robes y si awor aki a constata cu tin traspaso cu a bay robes e ora esun responsabel pa e escenario robes ta e mandatario di transporte publico.
E taxistanan cu a subi caya y a busca nan derecho tabata na nan luga y nan tin un punto, nan tur a haya nan permiso den un forma legal y na momento cu nan fayece of bira malo kico ta para di nan famia si minister Ursell Arends haci e cambionan cu e ta persisti pa cambia.
E taxistanan cu nan derecho basa riba e ley actual unda cu ta duna nan e posibilidad cu como taxista si mi muri of bira malo mi por traspasa e permiso y minister ta firma na final , pero si e scenarionan ta otro e minister por dicidi tambe na final di no firma. Mirando henter e escenario cu ta tumando luga e taxistanan mester haya oido y e mandatario mester siña dialoga y compronde ciudadanonan den e comunidad aki cu ta ciudadanonan cu a pone sinta riba e trono cu e ta y cu a crea un actitud arogante cu e ciudadano nan no merece.
Na final no mester sinta wak ken ta gana , na final loke cu ta bunita di henter e trayecto aki ta pa cada ken acepta nan fout y of eror pero drecha esaki na beneficio di cada partido pa por sigui biba riba e pida baranca aki di un manera digno trahando duro y abase di regla y ley.
Banda di e dos MB nan cu a keda presenta, den e reunion ultimo cu parlamento minister a indica cu lo bin cu un di tres MB y lo inclui un comision cu ta bay vigila e traspaso di taxista A pa B si acaso lo tin algo robes ta pasando, pero mirando e pensamento aki kico realmente ta e trabou e ora di e director actual y e comision existente? Nan ta funciona? Banda di tur cos gobierno no tin placa awor y ta trata di lanta un comision extra riba un comision cu ya ta existi ? con mester mira e maneho aki ? Maneho di cangreu ?
Banda di esaki tambe parlamento ta vocifera cu esaki por ta un solucion, pero cua solucion realmente? Tin un director y un comision caba , kico ta nan tarea e ora ? ta parce na mes momento parlamento ta na soño y blunder tras di blunder ta keda cometi ?.
Banda di tur cos awe nos ta 27 di augustus y prome di september ta aki par di dia y no ta mira ningun cambio cu ta tuma luga cu na final por bira un problema hopi mas grandi debi cu cosnan no a cana corecto. Esaki ta mustra na momento cu ta pone ken cu ta maneha y of goberna y e resultado ta kico cu ta y tur e MB nan ta mustra di e incapacidad di conocemento di ley y of con e sistema di goberna ta hinca den otro pa por maneha departamentonan di Pais Aruba.