Prome Minister Mike Eman, encarga cu e Ministerio di Cultura a asisti n’e di 16 edicion di “Arte di Palabra” na Cas di Cultura. E evento cultural di nivel halto, cu ta pone nos hobennan escolar rib’e podium pa expresa nan mes den forma creativo, poetico y cu hopi inspiracion. Prome Minister Eman a expresa su profundo admiracion p’e participantenan hoben cu, a pesar di nan edad relativamente hoben a logra captura sentimento y pensamento den palabra y poesia cu pasion, tono y profundidad. Skirbi un poesia cu mensahe profundo no ta un tarea facil. E ta un reto intelectual y emocional. Durante “Arte di Palabra” a mira cu nos hubentud ta capacita pa yega n’e nivel impresionante aki. E forma den cual nan ta expresa nan curason, cu sentimento cu ta sincronisa cu nan mensahe ta digno di respet.
Prome Minister a referi na algun di e frasenan iconico cu a marca historia mundial y cu ta recorda nos di e poder cu palabra tin pa cambia realidad. E palabranan manera ‘I have a dream’ di Dr. Martin Luther King, cu apenas cuatro palabra, a resona rond mundo, ta palabra cu tin un nificacion eterno. Mescos cu e yamada di J.F. Kennedy: ‘Ask not what your country can do for you, but ask what you can do for your country’ cu a inspira varios generacion pa tuma responsabilidad personal den construccion di nan pais. Sin lubida e promesa visionario: ‘Before the end of this decade, we’ll put a man on the moon’, cu a siña nos cu nada ta imposibel ora bo tin fe den e poder di palabra y vision.
Prome Minister Eman a enfatisa cu palabra por motiva, consola, inspira y hasta trece sanacion. Pero palabra tambe por causa daño, of desanima si no ta uza esaki cu bon intencion. Esaki t’e motibo cu nos mester midi nos palabra y uza nan pa yuda y halsa otro. Como gobierno, como lidernan, y como pueblo, nos tin e obligacion pa lanta un cultura di respet y cu palabra positivo cu ta uni, na luga di dividi. Gabinete AVP-Futuro ta felicita e hobennan talentoso pa nan palabranan di inspiracion pero tambe a felicita organisadonan di “Arte di Palabra” p’e bunita trabao.
