ORANJESTAD,Aruba
Cu interes di Aruba keda prevalece pa sirbi e interesnan di e ciudadanonan di Aruba”
Diamars 8 di September a tuma luga e apertura di aña Parlamentario nobo 2020-2021. Manera tur aña, e aña aki tambe tawata tin un celebracion solemne den sala di Parlamento. Un ceremonia poco diferente pa motibo di Covid. E aña aki contrario na añanan y costumber anterior, no tawata tin e mesun cantidad di invitadonan ni e marcha dilanti Parlamento. Sinembargo un celebracion mesun importante y mes solemne.
Den un declaracion cu Prome Minister Evelyn Wever-Croes a duna pa felicita Parlamentarionan cu un otro aña di trabou, el a subraya cu e aña tras di lomba tawata un aña Parlamentario hopi activo. Como Prome Minister, diferente biaha y riba su propio iniciativa, e mandatario a bay Parlamento pa duna informacion na Parlamento riba varios topico entre otro, Covid, Hulanda y integridad.
“Mi ta mira e aña nos dilanti como un aña hopi activo. Mi ta desea tur Parlamentario hopi sabiduria, y hopi bendicion den e lucha pa sigui sirbi comunidad di Aruba. Sr. Ady Thijsen a ser re-eligi como Presidente di Parlamento pa e aña Parlamentario nobo aki. Un pabien Sr. Thijsen. Mi opinion ta cu pa hopi aña nos no a mira un Presidente di Parlamento bon asina. Un persona cu hopi experiencia y conocemento pero tambe cu ta duna y haña respet y cu por mantene orden den sala di Parlamento. Esaki ta algo cu pa hopi aña mi no a wak y sigur ta di opinion cu esaki ta un bendicion pa Aruba y conhunto cu henter Parlamento mi ta spera cu interes di Aruba keda prevalece den sala y den tur debate pa sirbi e interesnan di e ciudadanonan di Aruba. Un pabien y hopi exito na tur Parlamentario den e aña Parlamentario 2020-2021”, Prome Minister Evelyn Wever-Croes a expresa.