Grupo di enfoke importante di KLM
Tourism Corporation Bonaire (TCB) tabata presente na un Evento Familiar grandi di KLM ku a tuma lugá dia 16 di desèmber na Amsterdam. E evento ku KLM a organisá spesialmente pa nan partisipantenan di Flying Blue, a yama bon biní na no ménos ku 7500 miembro. TCB tabatin un propio stènt, kaminda e bishitantenan por a haña informashon amplio tokante e bunita isla Boneiru.
Marjolein Oleana, Business Manager & Europe Liaison di TCB, a representá Boneiru na e evento di KLM. El a haña asistensia di dos studiante boneriano hopi entusiasmá, Jeadan Crestian i Sabine Schleper, ku den nan trahe tradishonal tabata aktivamente enbolbí na e stènt di Boneiru durante e dia akí. TCB ta duna hopi balor na enbolbimentu di hóbennan boneriano ku ta biba na Hulanda ku e tipo di eventonan akí.
E stènt di Boneiru no a ofresé solamente informashon tokante nos isla, pero nan a trit e bishitantenan tambe kos dushi lokal hopi sabroso. Nan a parti ko’i lechi ku Joycelin Pourier a traha, i tambe e sòpi di galiña outéntiko boneriano ku nan a regla via Cedric Soleana i ku Genaro i Brenuska Cicilia, bonerianonan ku ta biba na Hulanda, a prepará spesialmente pa e evento akí. Pa próksimo eventonan mas biaha TCB ta bai pidi nos talentonan boneriano pa prepará kos dushi i pasaboka pa durante eventonan na Hulanda.
Marjolein Oleana ta kontentu ku e partisipashon eksitoso di Boneiru na e evento. “Nos ta sumamente satisfecho ku resultado di e dia akí. Tabata un tremendo oportunidat pa promové Boneiru komo destinashon serka e grupo di enfoke importante akí di KLM. E echo ku nos tabata presente huntu ku Aruba i Kòrsou, a fortifiká presensia di e islanan ABC na e evento prestigioso akí.”
Den futuro TCB ta spera mas kolaborashon i evento pa sigui fiha atenshon riba Boneiru.
