E Landsverordening Instelling Ministeries (LIM) ta forma e base legal cu ta establece con e Ministerionan ta reparti y cua Minister formalmente tin e poder/autoridad di maneho pa cada Ministerio. E LIM ta un aspecto fundamental di bon gobernacion y transparencia den gobierno.
No ta secreto cu e gobierno actual (AVP-FUTURO) tin un reparticion di ministerio nobo, sinembargo ainda nan no a presenta na Parlamento pa trata e cambio di e LIM, pues esun di 2022 ta esun cu ta ainda ta esun valido. Esaki ta trece cu ne, cu tin un diferencia grandi entre loke e Ministernan ta haci, y ken ta legalmente responsabel y/of mester firma pa cierto decision cu wordo tuma. Pesey e ta sumamente importante pa e LIM wordo ahusta y aproba via Parlamento. Esaki mester wordo haci mas lihe cu ta posibel cada bes cu un gobierno nobo sinta y cu bin cambio na e forma con e Ministerionan ta reparti.
E situacion actual
Gobierno di Aruba ainda no a presenta e cambio di LIM na Parlamento, esey ta nifica cu gobierno ta hibando un maneho a base di un structura cu huridicamente no ta existi. Esaki definitivante ta trece risiconan y consecuencianan huridico cu ne. Ademas e ta crea falta di claridad y ineficiencia den departamentonan di gobierno y e ta tranca procesonan pa motibo di falta di claridad di ken ta realmente responsabel.
E risiconan tambe ta encera cu Ministernan ta fungi den rolnan cu no ta cay formalmente bou di nan Ministerio cual ta facilita mal uzo di poder. Un ehempel di esaki cu ya a mira cu ta tuma luga door di gobierno actual ta, cu un Minister Gerlien Croes ta atende reunionnan cu formalmente ta cay bou di responsabilidad di e Prome Minister of ta asumi tareanan cu no a wordo apunta su persona. Esaki sigur ta aumenta e falta di confiansa den comunidad y ta atacha e integridad di gobierno. Si prome minister no carga su responsabilidad como prome minister , dicon ta prome Minister ?
Gobierno por keda sin cambia LIM como un decision strategico?
Pa motibo cu no tin un termino specifico mara na e momento cu un gobierno mester percura pa e LIM ta “up to date” e ta dificil pa bisa cu nan no ta den cumplimento. Sinembargo e semper ta recomendabel cu LIM wordo trata mas pronto cu ta posibel, pa evita situacionnan den cual Ministernan ta eherce tareanan cu ta cay pafo di nan Ministerio y por mira esaki cu nan ta trahando contra di leyy?. Ademas mester tene cuenta cu esaki ta impacta e trabou di Parlamento pa controla e funcionamento di gobierno. Sin un LIM actualisa, e ta dificil pa Parlamento controla si un Minister ta eherciendo su tarea debidamente y atende cu ne debidamente. Pesey e situacion actual ta lanta e pregunta si e ta un decision strategico haciendo mal uzo di e sistema, pa cual e gobierno actual ainda no a presenta na Parlamento pa atende e LIM
Pa conclui, ta importante pa accentua cu e ahustacion di e LIM no ta un formalidad, pero un paso legal necesario pa salvaguardia bon gobernacion y transparencia den e aparato gubernamental. Sin esaki e ta atacha e integridad di gobierno di AVP-FUTURO y di procesonan den gobierno. Hecho ta cu sin ahustacion di LIM tin un situacion cu Ministernan por haci y deshaci sin cu nan ta responsabel legalmente. Kende lo para responsabel pa e esaki ?
RAAD van Advies cu un Dikke nul pa particion di cartera y ley di LIM di AVP-FUTURO “Esaki ta pa casualidad of strategicamente?”
