Aruba a conoce e aña aki un grupo grandi di 24 persona cu a ricibi un condecoracion Real pa motibo cu nan a destaca riba diferente tereno y/of a dedica nan mes na nos comunidad.
Comision Condecoracion Real Aruba ta informa cu entrante diahuebs 5 di mei 2022 pueblo di Aruba por entrega proposicionnan pa personanan ricibi un condecoracion Real otro aña, na ocasion di celebracion di aña di Rey na april 2023.
Pa un persona por wordo considera pa haya un condecoracion Real mester tene cuenta cu e accento ta cay riba prestacionnan particular pa y den comunidad.
Tin dos categoria:
- Trabou boluntario, pues trabounan pa cual e persona no a/ta ricibi salario;
- Prestacionnan particular cu un persona a haci contra pago, pues den su trabou.
E prestacionnan aki mester ta di un caliber y nivel di e halto ey cu nan ta surpasa locual normalmente nan ta spera di su trabou y mester tin un balor excepcional pa desaroyo di Aruba.
Tur persona of instancia cu conoce un persona cu na su opinion ta merecedor di un condecoracion Real por entrega un proposicion. Pa haci e proposicion aki mester haci uzo di e formulario special.
E formulario aki ta obtenibel entrante diahuebs 5 di mei 2022 na balie abou na entrada di Bestuurskantoor na Playa, na Bestuurskantoor na San Nicolaas, na tur MFA’s of cerca e miembronan di Comision Condecoracion Real Aruba. Tambe por download e formulario for di e website di gobierno: www.gobierno.aw, www.overheid.aw, www.government.aw
Formularionan:
Mester yena e formulario di proposicion completo y detaya. E persona(nan) of e instancia cu ta haci e proposicion (“voorsteller”) mester firma e formulario.
E motivacion di e peticion ta di crucial importancia. Pa evalua e meritonan di un persona cu bo ta propone pa un condecoracion Real ta di sumo importancia pa duna tur informacion pidi riba e formulario y pa menciona tur dato y informacion cu por duna realse na e trabou(nan) / actividad(nan) desplega door di e persona en cuestion.
Comision Condecoracion Real Aruba ta enfatisa cu otorgamento di un condecoracion Real mester keda un sorpresa pa e persona concerni. Pa e motibo ey ta di suma importancia pa NO informa e persona concerni cu ta bay haci un peticion pe, ni envolvi’e den e proceso di prepara un proposicion. Mester haci e trabao preparatorio den tur secrecia. Esaki lo evita un desapunto den caso cu no a logra haya un otorgacion pa un condecoracion.
E entrega di un proposicion pa un condecoracion Real mester wordo haci na balie di Bestuurskantoor Oranjestad den un envelop cera dirigi na Bureau Minister van Algemene Zaken, na atencion di Decoratiecommissie Aruba, Bestuurskantoor, L.G. Smith Blvd. 76, Oranjestad, Aruba.
Na Hulanda ta trata e proposicionnan pa condecoracionnan Real door di e organo cu ta carga e nomber di “Nederlandse Kapittel voor de Civiele Orden”. Nan ta duna e conseho definitivo pa cu e condecoracionnan Real y nan ta hopi estricto. Por ehempel, den caso cu un persona tin tremendo logronan pa comunidad, pero e tin por ehempel boetnan grave, un persona asina lamentabelmente no ta bin na remarca pa un condecoracion Real durante cierto periodo.
Por ehempel pa un boet durante un aña y dependiendo di e cantidad di boet durante mas aña.
Semper mester manda un peticion asina hopi luna adelanta pa por keda cla cu tur tramite na Aruba y na Hulanda pa asina e personanan por ricibi nan condecoracion na luna di april di e siguiente aña.
E aña aki e ultimo dia pa entrega un proposicion pa un condecoracion Real pa aña 2023 ta dialuna 25 di juli 2022. Por fabor tuma nota cu proposicionnan incompleto y proposicionnan cu a drenta despues di dialuna 25 di juli 2022 lamentabelmente no por wordo trata.
Aruba tin hopi persona cu ta contribui na nos comunidad mediante trabou boluntario y personanan cu ta destaca realmente den nan trabou. Ta deseo di Comision Condecoracion Real Aruba pa mira hopi di nan ricibi un condecoracion Real na 2023, mescos cu e aña aki. Ta p’esey un peticion na un y tur pa haci un esfuerso pa esaki bira realidad y pa asina Aruba por honra su hendenan balioso. Comision Condecoracion Real Aruba ta spera cu pa aña di Rey 2023 tambe comunidad lo reacciona cu hopi entusiasmo pa reconoce esnan cu ta haci trabou importante pa y den nos comunidad.
Den caso cu tin cualkier pregunta of pa mas informacion por tuma contacto cu e miembronan di Comision Condecoracion Real Aruba:
- Sra. F. Perez-Lopez (tel. 583-8425)
- Sr. V. Frank (tel. 587-4979)
- Sra. N. Anthony (cel. 593-1921)
- Sra. I. Nicolaas-Ras (tel. 584-8880)
- Sra. R. Garrido (cel. 593-1820)
- Sr. D. Figaroa (cel. 741-0100)
Tambe por acerca e comision via e-mail: condeco.aruba@gmail.com