Movementu Kousa Promé a tuma nota ku Plasa Moises Frumencio Da Costa Gomez ya pa vários aña kaba no ta un plasa mas pero a para bira un terasa komersial. A yena e plasa ku tur sorto di negoshi di kome i bebe i benta di suvenir. Por poko por mira e estatua di Gomez. Den añanan anterior mester a move e estatua mas dilanti pa por a wak’é. Pero asina mes e negoshantenan a keda tuma tur e plasa pa amplia i agregá mas negoshi. Kousa Promé no tin problema ku desaroyo ekonómiko den sentro di siudat. Alkontrario nos ke mira mas desaroyo. Pero no a kosto di baluarte Mr. Dr. Moises Frumencio da Costa Gomez. Unda rèspèt i honor pa e baluarte importante aki a keda? Unda patriotismo a keda den pais Kòrsou? Unda e rekonosementu i balor pa un baluarte nashonal a keda? Unda e rèspèt i balor pa e plasa importante aki a keda?
Ekspertonan ta splika ku un plasa ta mará na regla pa e por ta funkshonal. Algun di e reglanan ta: espasio kaminda hende por move, agrupá i sosialisá. Kaminda tin sufisiente akomodashon pa hende. Ekspertonan ta bisa ku tin ku tene kuenta ku nifikashon di e plasa spesialmente pa loke ta trata su historia i e loke e ta para p’e. E plasa aki t’ei pa duna homenahe i rekonosementu na e yu-di-Kòrsou Moises Frumencio Da Costa Gomez.
Dòktor tabata presidente di e promé Konseho Gubermental di Antia. El a pone e promé pasonan pa yega na outonomia di Antia. El a yuda demokratisa elekshon i habri kaminda pa pueblo kompletu por partisipá na polítika. Na 1948 el a logra derecho general di voto pa Antia kompletu. Promé ku esei ta makamba i komersiantenan pudiente so por a vota i keda eligí pa goberná Kòrsou. E Konseho di Gobernashon di Gomez a saka e prohibishon legal di tambú for di lei di órden públiko aki na Kòrsou.
E tabata un polítiko di gran mérito pa Kòrsou
E estado aktual di Plasa Gomez ta inaseptabel. E plasa a bira pa komèrsio i ta keda tras di lomba di e estatua di e gran Gomez. Fui Kòrsou kon por ta? Gomez no ta meresé esaki. Movementu Kousa Promé den kuadro di su filosofía pa yega na identidat i unión nashonal ta boga pa rehabilitá e plasa i pone bèk den su gloria anterior. Rehabilitando Plasa Gomez ta duna balor bèrdadero bèk na e baluarte yu-di-Kòrsou mr. dr. Moises Frumencio Da Costa Gomez.
