KRALENDIJK,Bonaire
Kolegio Ehekutivo ta tene su reunionnan semanal un biaha pa luna na Antriol, Nikiboko, Nort’i Saliña, Playa, Rincon i Tera Kòrá. Kada biaha un di e barionan aki ta na turno. Resientemente Kolegio Ehekutivo a disidí esaki. Djarason último gezaghèber Edison Rijna i e diputadonan Nina den Heyer, James Kroon i Elvis Tjin Asjoe pa promé biaha a tene nan reunion di gobièrnu na Rincon na e sentro multifunshonal Cocari. Den pousa Kolegio Ehekutivo a bishitá e hende grandinan na Cocari pa skucha nan eksperensianan personal. Durante e bishita diputado Elvis Tjin Asjoe a toka algun piesa riba su kitara.
Despues di lùnch Kolegio Ehekutivo a bai stadion di Rincon, Stadion Antonio Trenidat, pa wak su estado aktual i e fasilidatnan ku tin einan. Tambe Kolegio Ehekutivo a tira un bista riba e parti bieu di kaminda Broertje Janga. Te ainda no a terminá e trabounan na e kaminda aki. Tambe Kolegio Ehekutivo a hasi un bishita na Kolegio San Luis Bertran. Entidat Públiko Boneiru a reservá medionan pa drecha e parke di hunga di e skol aki.
Di awor en adelante Kolegio Ehekutivo ke reuní den nos barionan. Pa Kolegio Ehekutivo ta importante pa enbolbí suidadanonan mas tantu posibel ku su maneho. Ora di tuma desishon tambe Kolegio Ehekutivo ke tene kuenta ku loke ta biba den pueblo. Pa e motibu aki Kolegio Ehekutivo ta bai reuní mas tantu biaha den nos barionan i bishitá habitantenan di bario pa tende kiko ta nan deseonan i ideanan.
Si den un kombèrsashon asina kasonan urgente bini dilanti, Kolegio Ehekutivo por trata eseinan mesora òf pone nan riba agènda di un siguiente reunion. Kolegio Ehekutivo por skohe tambe pa konsultá mas aleu ku habitantenan di bario apart. Ku e reunionnan di gobièrnu den nos barionan i e bishitanan serka habitantenan di bario, Kolegio Ehekutivo ke reakshoná rápido i dirigí riba loke ta andando den komunidat.
