Durante luna di maart ta pone atencion riba Dia Internacional di Riñon cual e aña aki ta
diahuebs dia 13 di maart. En conexion cu e luna aki, Horacio Oduber Hospital (HOH) a mira e
oportunidad pa anuncia y comparti cu comunidad di Aruba cu pronto lo start riba un Centro di
dialisis nobo. E proyecto aki a inicia algun tempo atras unda cu a sondea diferente posibilidad
pa amplia y trece hunto e clinica di Dialysis y e policlinica di Nefrologia asina brinda servicio na
pashent na mesun lugar. Esaki ta cuadra cu e vision di HOH esta “Accessible health care for
everyone without compromising on quality”.
Proyecto “state of the art”
“Den luna di maart nos ta pone atencion riba e Dia Internacional di Riñon y ta p’esey a scohe
awo pa anuncia y comparti cu comunidad e proyecto nobo aki”, asina Gregory Croeze, miembro
di Hunta di Directiva di HOH, a inicia bisando. Ademas el a comenta cu inicialmente e espacio
riba piso 5 tabata programa pa bira oficina pero a prefera pa cambia di idea y destina e piso aki
cu un bunita bista pa nos pashentnan di dialysis. E team encarga cu e proyecto pa e Centro di
dialisis aki ta consisti di colega di diferente departamento pa percura cu ta cubri tur e puntonan
necesario pa e ta un exito.
E pashent na prome luga
“Como nefrologo mi ta hopi contento cu e proyecto aki”, asina nefrologo Romeo Kock a inicia
bisando. E ta hopi gradicido cu Hunta di Directiva a tuma e decision pa expande y crea un
espacio pa asina HOH haya un “state of the art dialysis center”. E centro nobo lo ta ubica riba e
di cinco piso di e edificio principal di Horacio Oduber Hospital, esta den Toren A.
Dokter Kock ta di pensamento cu riba di cinco piso pashentnan lo sinti nan mes mas contento
cu’n espacio mas amplio y cu un bunita bista di Aruba. Alabes tin idea pa introduci inovacion
den tratamento y door di incorpora e policlinica akinan tambe, lo rece cune mehoracion den
comunicacion y, intercambio di informacion entre nan tur, esta e specialistanan, e nursenan y
sigur e pashentnan.
Experiencia di pashent
Jacco Vroegop, Presidente di Hunta di Directiva di HOH, a expresa cu pronto lo cuminsa cu e
destaho publico pa despues cuminsa cu e construccion. E ta spera cu denter di un aña lo por
atende e prome pashent den e Centro di dialysis nobo aki. Vroegop a splica cu parti di e vision
di HOH ta encera tambe hospitalidad. Pronto e pashentnan cu ta tuma dialisis tres biaha pa
siman no lo mester sinta wak muraya mas manera ta e caso awo, pero lo por tin un experiencia
mas bunita cu e bista di nos lama. Esaki tambe ta yuda pa haci e experiencia uno hopi mas
placentero, pues un bunita proyecto na beneficio di nos pashentnan di dialisis y no lubida,
tambe pa esnan cu ta bishita nos isla y tin mester di dialysis durante nan vacacion.
Finalmente Hunta di Directiva ta gradici tur stakeholder interno cu ta trahando duro riba e
proyecto aki. Tambe team di HOH ta recorda tur hende cu bo riñon ta mantene bo saludabel
pues cuida nan. Bebe suficiente awa, come saludabel y haci ehercicio. Horacio Oduber Hospital
ta contento cu un otro paso importante den mehora servicio y calidad di cuido medico pa Aruba
henter y alabes pa tur cu ta bishita nos isla.
