Local

Ruthy”Lady Ruth”Vrieswijk-Bergen: Sabiduria den nos Alegria


Diahuebs dia 1 di September ta Dia di Prensa. Un dia den e mundo di media, social media, tur miembronan di prensa audiovisual, radial  y skirbi. Ta manera cu noticia na canalnan di televishon ta manera un crenchi den pasado, mirando cu hopi ta sigui e noticianan mas importante atraves di 24ora.com,  earubianonews of  vip tv radio  riba nan telefon cellular, just pa menciona algun di nan excellente den nan trabao.  Ahaaaaaaa! Pero tin hopi cu ainda toch ta gusta sinta wak televishon anochi y wak noticia trankil drumi ariba cama of sinta den nan “recliner”, pia herek. Mescos cu corant. Kizas e cantidad di cumprador y lesadornan di corant a baha un crenchi, pero toch nan tambe tin nan clientenan fiel cu kier lesa na un manera trankil, pagina pa pagina di tur locual ta sosodiendo rond di nan. Y, no ta tur hende tin y of por traha cu un cellular. Mas tanto ta e hobennan di awendia ta wak riba social media e noticianan di mas nobo. Parse tambe cu no tin hopi noticia echt echt nobo mas, tur ta ripiticion di cosnan cu a yega di sosode caba, numa den un forma un tiki diferente kizas. Manera e accidentenan den trafico, peleanan dilante clubnan nocturno y of hogamento den laman, mas tanto na Baby Beach. Problemanan familiar, violencia domestico y of otro sortonan di violencia tambe ta hanja nan debido atencion, aunke etika di prensa ta, pa no pone potretnan di e victimanan cu a muri of ta golpea. Sensacionalismo ta algo dificil di evita si kier tin e “primicia” di locual a caba di sosode. Danki Dios cu tin noticianan bunita y agradabel tambe. Manera noticianan di deporte of noticianan riba terreno cultural, manera e fiesta di folklore den e barrio di Brazil cu tur su reinanan bunita of e festival di Caha di Orgel den club Sportboys na Angochi transmiti pa VIP  tv radio. Oh, ki bunita pa wak tambe  e paradanan den e barrio di Brazil, tur bisti den nan trahenan folklorico cu musica folklore. Ki bunita ora nos por lesa tur caminda cu nos Reina di laman Sarahquita Offringa a bolbe logra obtene un otro titulo di campeon den su ramo di deporte acuatico. Shonnan, nos no ta criticando ningun media, ningun miembro den prensa. Al contrario, nos kier gradici y felicita nan cada un pa cu nan bon trabao di informa debidamente e medaya di noticia cu su dos bandanan. Lady Ruth mes ta un cu ta aprecia e bunita cooperacion di publicacion regularmente di su relatonan semanal.  Nos relato simpel pero cu amor den nos dushi  Papiamento simpel tambe, teniendo cuenta mas tanto cu nos grandinan. Ach, ta asina mundo ta sigui lora, cu of sin noticianan malo mahos of noticianan positivo y bunita. Hopi ta pendiente tambe di e noticianan ariba tereno politico, aunke no gusta pa tur. Tin biaha hopi promesa. Hopi scuma, poco chuculati ? ( Ainda nos ta wardando ariba nos verkeersplato of sleeping police den Dadelsltraat, Dakota ) Departamentonan concerni no ta hasi nada y ta bisami pa manda MP Evelyn Croes un carta , ta pakico tin e departmentonan y of DOW anto, pa pronk ? Nan no por hasi nada sin e permiso di MP ? Pica, e tin hopi trabao caba riba su schouder. Ufffff……

E noticia , e bon nobo cu nunca ta perde su balor, ta locual tin na sabiduria den varios di e bukinan den e bijbel. Ainda nos por sigui sinya mas mihor con mas pa stima y pordona, con pa no huzga, pero  fortifica nos fe, con pa laga los di cosnan cu no ta cumbini nos, con nos por yuda nos prohimo y mucho mucho mas. Poetanan local y internacional expresando nan mes den tur forma di amor pa e ser humano, naturalesa of pa nos Creador di Amor. Poemanan cu ta bira cancionnan inmortal.

Entrevistanan, documentario y homenahe. Y asina ta sigui, dia den dia afor. Pone hende den luz pa nan bunita logronan of den scuridad pa nan fayonan cometi. Nos por corda si, cu , ningun di nos ta perfecto ni maske bula riba cai abao. Nos tur tin un oportunidad nobo cu cada dia nobo regala na nos. Si abo ta sin pica, tira e prome piedra. Stop di huzga otro. Reza pa tur.

Lady Ruth tambe ta pensa, cu, hopi ta skirbiendo nos idioma Papiamento mihor cu varios anja pasa. Y tambe esnan hoben dilanti pantaya a amplia nan vocabulario. Tin cu tin mas tempo den prensa cu otro, tin cu mas experiencia cu otro, pero tur cu ta den prensa ta hasi nan best cu curason den locual nan ta hasiendo tur dia. Mas y mas talentonan nobo descubri. Na tur miembronan di Prensa na Aruba, masha masha pabien  riba boso dia ! Den nomber di pueblo danki pa boso bon trabao di informa pueblo, y asina tambe re-educa pueblo riba varios aspectonan di importancia den nos comunidad. Cu e Autor di bida sigui skirbi riba boso pagina tambe hopi amor, paz, trankilidad, alegria y sabiduria tur dia ! Cu bendicion den nos y boso bunita balans mental, emocional y spiritual den un bon curpa fisico.

 P rensa, sigui cu boso bon trabao di informa nos tur cada dia

R ondona pa seguridad riba caminda den un trafico pisa

E satisfaccion di boso logronan di comunica tambe alegria

N os , como e Poeta Local Lady Ruth den esaki ta inspira

S embrando un simia di oracion duna Bon Dios danki pa cada un di boso

A we, boso por bolbe reflexiona y sinti e amor den boso curason yen di goso 

Danki na Bon Dia, Diario, Solo di pueblo, Earubiano news y 24ora.com pa boso cooperacion di curason na publicacion di Lady Ruth su relato “Sabiduria den nos alegria “ fielmente. 

Cu un pabien grandi pa Radio Galactica cu nan Top 100 di The Cats, di Volendam Hulanda.

Ki dushi e programa aki tawata Diadomingo . Danki na e curason di GFM Joe Hernandez y su team dinamico. Danki Aruba, “Stay safe”, Love you too !

Related posts

Taskforce di Reino pa Derecho di Mucha ta haya su propio website

EA News Author

Parlamentario Alan Howell Tin diferente posibilidad pa nos muchanan por sigui haya les

EA News Author

Parlamentario Endy Croes: Ministerio Publico ta den neutral of reverse?

EA News Author

Leave a Comment