Den calidad di Secretaris General di MEP Endy Croes ta reacciona riba e carta cu Mike Eman a entrega na VNO siman pasa. Dicho carta a wordo firma pa Marisol “Kukwisa” Tromp di partido MAS y tambe Miguel Mansur di Accion 21. Hunto nan a entrega un carta pidiendo pa Hulanda tuma Aruba over. Ora nunca bo a lucha pa Status Aparte berdad, bo no sa su balor.
Frapante ta e parti unda Mike Eman a skirbi un alinea den dicho carta pa Hulanda referiendo na ‘Nepotisme’ y ‘Vriendjiespolitiek’. Mike Eman den dicho carta pa Hulanda kier tilda e Gobierno actual di ‘Nepotisme’ y ‘Vriendjiespolitiek’. ‘Het kan verkeren’! Mike Eman a lubida hopi lihe con Mike a cria su famia y amigonan cu miyones di placa di pueblo. Pa refresca memoria di Mike nos ta recorde con Ven Eman su ruman homber a ricibi nada mas y nada menos cu 1.9 miyon florin como “SPONSERSHIP” pa 1 auto di careda cu a core na Merca bou nomber di Team Aruba! Pista di Palo Marga tabata deteriorando y necesidad pero no a ricibi ayudo mientras Mike su ruman si a wordo privilegia cu 1.9 miyon di fondonan di pueblo. Desde fin di 2017 cu mi a fungi como Parlamentario mi a haci uzo di mi derecho pa haci preguntanan por escrito na entre otro ATA y AAA. Den contesta oficial ricibi di ambos a wordo confirma cu Ven Eman (ruman di Mike Eman) a ricibi 1.6 miyon florin pa 1 auto di careda a traves di ATA. Mike no a keda solamente na ATA paso Mike a pidi y brinda fabor na su ruman Ven Eman a traves di AAA tambe. AAA tambe a confirma por escrito cu Ven Eman a ruman di Mike Eman a ricibi 300 mil florin adicional via AAA. Pues ruman di Mike Eman esta Ven Eman a ricibi un total di 1.9 miyon florin di ruman pa ruman. Te hasta tabatin un contracto nobo di 1 miyon florin extra firma momento cu AVP a baha pero e Gobierno nobo na 2018 a logra kibra e contracto aki. Na Mike Eman con bo ta categorisa esaki? ‘Nepotisme’’ of vriendjiespolitiek’? Mike por aclara si esaki ta ‘Nepotisme’ of’ vriendjiespolitiek’? Of kisas ‘Friends & Family’? Mike su ruman muhe Sandra Eman tambe a traha cu Mike y a cobra aparentemente alrededor di 1 miyon florin. Mike por aclara? ‘Nepotisme’ of ‘vriendjiespolitiek’? Anto net Mike Eman kier manda carta Hulanda cu tanto barbaridad. Nos sa cu VNO ta lesa tur articulo den prensa y ta traducinan mandanan pa Hulanda. Pues cu hopi placer si VNO mester prueba di dicho cartanan cu ta comproba cu Ven Eman a ricibi 1.9 miyon florin for di su ruman Mike Eman esakinan ta na Staten pero mi tambe tin copia. Henter siman nos lo sigui descifra e carta sin pia sin cabes di Mike Eman pa Hulanda unda Mike ayuda pa Marisol Tromp y Minguel Mansur manera 3 traidor di patria ta pidi Hulanda pa tuma over solamente pa rasonnan personal paso nan no por deal ainda cu e resultado di eleccion. Nos tin un sistema democratico unda pueblo ta scoge su representantenan cada 4 aña. Laga pueblo scoge e proximo eleccion su representantenan y no yora na Hulanda pa intermedia. Mike bin bij!