Nos relato di e siman aki, ta algo di mi curason como artista pintor pa un otro artista pintor. Semper Lady Ruth a bisa su “scoutnan” tempo e tawata activo ainda como lider Bubbels, cu , den cada persona tin un artista. Sea un pintor, cantante, baylador, Poeta, musico etc. etc, pero cu no ta tur hende ta sali bin padilanti cu ne den publico. Otro ta canta den banyo, mientras otro ta skirbi su pensamento y sintimentonan poetico pa e so lesa. Kizas un crenchi miedo of un crenchi berguensa of como proteccion pa no comparti pasobra no sa kiko otro ta bay bisa di dje, di su talentonan scondi.
Ki bunita pa por a bishita un Mini-expo di obranan pinta pa nos dynamico Prome Ministro Sra. Evlyn Wever-Croes recientemente den e Cede di Mep den curason di Sta. Cruz. Nos por corda cu e tambe a yega di participa na worshop di arte serca e artista multifacetico Sra. Laureen Eman.
Evelyn no a keda para keto despues di e workshop aki y a cuminsa experimenta ariba su mes cu technieknan diferente y asina sigui expresa su mes den su arte. Obranan super nice ! Colorido y expresivo cu ta toca e curason . Ela hanya net su zjeito , pa “Relaha y Recarga” pa por sigui enfrenta retonan grandi den su trabao como Ministro Presidente. Aruba por a nota un cambio bunita y positivo den su bistimento mas alegre tambe, trahenan ketobay elegante, pero cu tokenan di flor y of otro disenjonan artistico, colorido y inspirativo. Mas caribense, y no asina stijf y serio serio mas, aunke tin momentonan ketobay pa bisti eseynan tambe. All in all, nos, como artista pintor ta aplaudi e cambionan aki y sigur a hanya mas respet pa su libertad den expresion artistico.
Nos sa tambe, cu nos bunita ministro di Finanzas y Cultura Sra. Xiomara Maduro varios bez a expresa su mes den su mesun Poemanan bunita cu e mes a inspira y pone riba papel pa varios occasion cultural. Hopi pero hopi bunita ! Lady Ruth ta apoya nos hendenan muhe den cualkier posicion cu nan ta eherce profeshonalmente cu curason. Lady Ruth , durante su bishita na e mini-expo “Relaha y Recarga” a admira cuadranan masha bunita mes, den disenyonan abstracto cu colornan yamativo. E anochi ey nos a topa cu hopi cara y curason conosi, manera e gran artista Maritsa Erasmus y colega artista Poeta Ariana Koolman, Glenda Diaz y Leticia Wever kendenan tambe ta un artista y escritor den nan expresionnan liber den nan mesun arte. Nan ta sigui nan mesun curason y lo ta den mas luz tambe un dia sigur.
Tawata nos MP su cumpleanos tambe, pues, dobbel celebracion. Nos ta felicita nos flamante MP Evelyn Wever-Croes cu su tremendo prome mini-expo y tambe nos ta dune pabien pa su cumpleanos cu e deseo pa hopi mas di salud, alegria, sabiduria y arte ! Nos a comprende cu tur fondo recauda na benta di e cuadranan ta bay den regalonan pa famianan cu mas tin mester. Ki bunita gesto, berdad ? Tawata nos prome bishita na e cede di Mep, y nos a keda impresiona cu e “standbeeldnan” di Betico Croes dfm, obranan fantastico di artista Maritsa Erasmus. Te asina leu mi relato cu e toke artistico di un hende muhe fuerte cu ta hasi su best pa dirigi nos pais mas mihor cu ta posibel. Un hende manera tur hende, cu amor y sintimento pa su famia y pa Aruba. Un role model pa hopi. Danki pa ta bo mes ! Sigui cu e bon trabao y sigui relaha y recarga ! Pabien un biaha mas ! Un bearhug di Lady Ruth pa tur nos lectornan !
