Den meymey, den centro di alma, mente y curason, “The Core” tawata tin tur nos atencion di curason recientemente den un fin di siman hopi bunita, na unda Poetanan a shine atrobe, bau di un luna no yen kizas, pero si cu su divino claridad y lus acompanja pa algun streanan. Den oranan di merdia caba Johan y ami a bay dal un keiro den Mangel Halto nan ey, pa wak unda exactamente e lugar aki ta situa. Anto den oranan di anochi Lady Ruth a bay pa a forma parti di un grupo di dushi hendenan cu nan curason, mente y alma artistico y inspira pa comparti algo di e tema “ Laga nos ta Paz”. Tawata e ultimo Poetry Night pa 2022 carga pa Basha Foundation. Asina cu nos a drenta “The Core” nos a sinti e buniteza di e pinturanan na muraya, un di nan di e.o. e artista Natusha Croes y Mo Mohamed. Danki Dios cu e cachonan no a blaf spanta Lady Ruth ora ela yega, nan tawata manera drumi relaxing. Un cos cu Lady Ruth a sinti, tawata hopi amor y paz ora ela ricibi un fuerte abraso di Sophie, e propietario di The Core. Un brasa largo , profundo y fuerte. Nos a bay pa participa cu nos poema nobo cu nos a inspira na e idioma ingles pa cuadra cu e tema di e bunita anochi aki, na unda ta expresa sintimentonan di amor, paz, alegria etc. locual ta na e curason di e Poeta e momentonann ey. E tema tawata :”Let us be peace”, Laga nos ta paz. Ki dushi tawata e atencion cu esnan presente a duna cada Poeta y of Escritor cu tawata recitando of contando nan storia. Den un silencio total, cu algun blafmento di e cachonan cu a aproba e poemanan. Un grupo respeta, un grupo inspira. Entre otro e caballero , homber di teatro, Charles Croes, Sally cu a habri e bunita anochi y recita pa prome biaha, Sophie mes, Maria Silva Hart, un otro Maria y Lady Ruth. Coronacion di e anochi cu e pianista hoben y talentoso Jeandre Tromp di unicamente 17 anja di edad, cu a impresiona cada un presente cu su bunita manera di toca, anto, cu e mes a sinja su mes toca asina fantastico ! Despues a bin un grupo di 3 artista riba guitarra y drumset, e” cherrie ariba e bolo”, “Xavi waves” , “Andrea, Xavi y Jair”, cu a toca nan repertorio suave y despues hopi alegre tambe. Ki bunita ! Nos tawata un crenchi cansa, pero ,si nos a comprende bon, e lugar aki “The Core”. ta na bienestar di comunidad riba tereno di arte pa papia y scucha otro, comparti cu otro. Sophie tin bunita amistad cu tur su bisinjanan banda y rond di dje unda e cas “The Core” ta situa .Un crenchi patras banda di e pool Jerrel tawata traha e pizzanan di mushroom y siboyo den crenchi sucu of algo zoet di mas dushi , cu a wordo cumpra pa esnan come nan pizza hunto cu un dushi glas di binja of mojito di hibiscus thee. Nos a hasi conosi cu Andrea di Roemenia casa felismente cu Elvis, un caballero arubiano , nos a combersa un crenchi cu Sophie y Maria Silva Hart y despues nos por a saluda tambe Efraim Odor y despues Leo Phillips cu a yega un crenchi mas laat, despues di un otro compromiso. Contento di por a combersa un crenchi tambe cu Charles y Beach Lama. Sophie and Maria Silva Hart, you are the blessings ! Danki pa a organisa un anochi asina fabuloso ! Sophie, thank you for opening of house home and heart for this Poetry Night. May the peace and love you shared in your beautiful Core House be filled and blessed always with more peace and more love from our Painter, our Poet, our Architect of the Universe. Danki shonnan, pa lesa nos relato cu atencion ! Corda cumpra bo carchi pa bin wak nos One woman show “Alegria di Ruthy 3″ dia 14 di December venidero pa 8 pm den Cas di Cultura. Mientrastanto, “stay safe, love you too !”
Mientrastanto, keda pendiente pa nos bunita relato di e tremendo exposicion di “Stanga” Heinze, cu a capta e atencion di tur presente Diasabra dia 15 di Oktober na Unoca.
