Un saludo caluroso pa tur nos lectornan. A peticion , nos ta sigui un crenchi mas cu un otro relato festivo. Nos ta comparti awe, con Lady Ruth a festeha cu un grupo di 25 amiga su di 66 cumpleanos no mucho tempo atras. Nos pensamentonan a dual na e wega di domino, ora ta sali cu e piedra dobbel seis. Nos a pensa tambe riba e famoso artista mejicano Frida Kahlo dfm y asina a bin cu e idea di celebra cu e tema aki di Frida Kahlo, pasobra nos tur sa pasa den situacionnan penoso y doloroso, nos tur ta bira mas fuerte dia pa dia y nos tur ta sigi briya cu nos mesun curason den lus cu bendicion di nos Creador di amor. Mi bunita amiga artista hopi talentoso, Bea, a dorna Veranda Shon Johan den un ambiente colorido festivo a la mejicano.
Bea a sorpresa nos tambe cu un dushi mesa yena cu tacos cu”alles erop en eraan” masha masha dushi mes ! Tur presente por a sirbi nan mes, segun nan mesun smak di tacos. Sin laga afor chef Gilbert cu asistente Isidora cu a percura pa tur demas snack y hapjes y un sopi di boonchi super dushi mes , tur a la mejicano. Den e parti musical nos a malcria nos mes cu e cantante Victor Samuel el duque cu su dushi baladanan y demas cancionnan alegre den su repertorio, habriendo e atardi cu bahada di solo na un manera espectacular. Despues mi guapo primo guitarrista clasico y di musica popular y moderno, Jerry Diaz, “the best” a deleita nos cu su dushi musica y asina e dushi ambiente a continua cu nos tur cantando y bailando den Veranda Shon Johan. Dushi pa mira tur amiga cu un of otro flor den cabey y cu trahenan y of algo colorido representando Frida Kahlo.Mi bunita prima Yvette tawata tin un bunita blusa cu riba dje e cara di Frida Kahlo. Lady Ruth, den su alegria total a canta tambe su cancion faborito Jambalayah. Nos a pasa pret, nos a hari cu smak pa algun jokenan cu a presenta nan mes. Y nos a canta ! Un bolo “torta real”regalo di Ruthy su amiga ruman Valerie a baha masha masha dushi mes cu e binja specialmente pa hende muher den un botter super special, regalo di su cunja Anna, cu a completa mas e dushi anochi. Anna a regala nos dos botter grandi di e dushi binya aki y no por a termina tur dos botter, pasobra tequila tawata skeiro, anto un tequila rose cremoso masha masha dushi mes, manera un baileys asina. Den esey, Mariachi Perla di Aruba a cana drenta cantando nan repertorio alegre manera ta nan custumber. Great cu tawatin 2 cantante femenino den nan grupo e biaha aki. Bon amiga Verna a canta su cancion faborito cu Mariachi y tambe Victor Samuel a canta cu Mariachi. Claro cu Lady Ruth a canta su “No volvere”y mas cancionnan cu nos tur por a canta hunto, manera Cielito lindo y El rey. Tawata un fiesta cu a cuminsa 6 or pm cu bahada di solo y cu a dura te casi mei anochi. Nos no kier a rek e mucho laat, pasobra e tawata den siman of ta riba un diabierna cu compromisonan pa diasabra den dia. Nos a goza hopi mes !
Shonnan, ora tin motibo pa celebra, si por, celebra ! Nos edad ta sigui subi y nos no sa te ki dia nos por bayla y canta nos Jambalayah. Tanten cu por, por ! E alegria di Ruthy ta continua “ off stage”” , ya cu ela inspira hopi cu su tres shownan den pasado, tin dushi alegria den cada dia di su bida. Mester sigui goza, pasobra sin spera tristeza por bati na porta.
Gradicido na Dios pa nos talentonan cu nos por sigui comparti y inspira tur rond di nos.
Dios mediante, preparando awor pa e fiestanan di fin di anja ! Cu otro palabra, fiesta ta sigui !
Pero promer cu eseynan, nos lo brinda cu nos mayornan Lucas y Mercedes nan di 70 aniversario di boda den e luna di November. Danki Dios pa nan salud, alegria y sabiduria !
