Bon dia yen di sabiduria den nos alegria ! Y asina nos ta despedi di e luna di Oktober, luna di flor yena cu hopi amor. Un luna den cual nos isla turistico tambe ta celebra e fiesta mericano Halloween cu su “trick or treat”pa e muchanan cu ta pasa rond pa pidi mangel, bisti den nan costuumnan bunita of mahos cu nan caranan tur pinta. Pero e no ta un fiesta di mucha so, hobennan y hobennan adulto tambe ta hunga e wega aki y ta organisa fiestanan pa cu esaki. Tin biaha e bishitanan na cas pa cas ta sali e mayornan caro, ora cu tin hendenan na cierto casnan ta duna mangelnan cu blade of algo skerpi peligroso den nan cu ta causa e muchanan danjo. Lady Ruth no ta corda bon bon mas, e origen di e celebracion aki, den cual e berdura pampuna ta hunga un rol importante tambe. Algo di cosecha of zo ? Tempo di su tempo trahando na Aruba Beach Club/Casa del Mar, ela disfraza na un bruha cu e sombre punta cu turistanan a yamele”A beautiful witch”, hahahahaha. Nos a tende y lesa, cu e obra teatral “Spirito” tawata exitoso den Cas di Cultura y cu Ramon Tod Dandare a traduciele magnificamente den nos dushi idioma Papiamento . Nos ta felicita henter e elenko di artistanan cu tawata hunga y actua den e obra aki. Y papiando di artista, nos por a presencia un bunita anochi cu musica di harpa den un lugar na Rotterdam, Hulanda, di e harpista Minou den Hals, cu rumannan di varios lodgenan na Hulanda, cu celebracion di nan kapitel su di 75 anniversario.. Un bunita anochi cu e “”sisternan” presente. Hasta por a los e pianan y e heupnan un crenchi riba dushi musica di un DJ. Prome cu nos a bay bek cas, Lady Ruth a pidi e dj un peticion pa e bunita cantica na hulandes di Andre Haazes “Leef” y nos a subi pista di baile atrobe, hunto cu Mieke y algun rumannan amigo mas. E tawata un bunita anochi cu un bunita celebracion. Un anochi deftig cu e cabayeronan tur den tuxedo. Snacknan a la gourmet masha masha dushi mes banda di e champagna y dushi binjanan.
Pa awor ya varios di e radio emisoranan na Aruba a cuminsa toca canticanan di Pascu, pa anuncia e fiestanan di fin di anja. Famianan lo reuni atrobe pa festeha hunto e fiesta di e nacemento di e ninjo Hesus hopi anja pasa. Varios ya a cuminsa traha ayaca. Nos tawata tin e bendicion di por a celebra bida atrobe cu nos yiunan y nietonan na Madre Patria. Pasa tempo hunto. Awor bek na nos bida real, cu curason yen di bunita recuerdonan atrobe cu nos a crea y realisa hunto. Claro cu un parti di nos curason a keda ayabandanan, cu bunita recuerdonan.
Danki pa lesa nos relato cu hopi amor y atencion atrobe. Sigui cu e preparacionnan pa cu e temporada festivo di fin di anja. Corda duna bo Creador di amor danki pa salud , alegria y sabiduria. Accepta e dia nobo como un regaldo nobo cu su oportunidadnan nobo tambe. No laga material ciega bo curason y scoge pa comparti tempo, atencion y amor cu bo famia y prohimonan ruman. Nos ta duna Dios danki pa cada dia, cada momento, cada experiencia, cada les y cada bendicion den nos bida. Un “bearhug”di Lady Ruth pa lectornan tur cu ta gusta lesa cosnan positivo cu ta inspira. Shonnan, pasa un felis dia!
