Oelalaa ! Druk ! Tur hende ta druk den e ultimo dianan di e luna di December 2024 aki ! Nos a
ripara cu Diario tambe ta yen di noticianan y propagandanan pa e dushi temporada di fin di anja
y ta pesey esaki lo bira nos ultimo relato pa 2024. Ban spera cu toch e dos relatonan cu falta sali
toch den Diario tambe ainda , e otronan falta esaki so pa sali ainda. Cu un gradicimento na nos
curason pa Diario, Solo, Extra Bonaire y EANEWS di e simpatico y dinamico Farrah
Boekhoudt, como unico hende muhe den prensa cu ta move ariba caya pa acumula su
informacionnan. Masha masha masha danki pa e fantastico cooperacion di curason pa
publicacion regularmente di nos relatonan semanal. Pa esnan cu ta puntra ora un siman e no sali
den Diario, nos tin cu bisa nan, cu nos no ta un prioridad den noticia, aunke hopi ta lesa nos
relatonan social cultural y ta duna nos bon feedback y bon comentario regularmente. Ta keda
den nan man, segun espacio disponibel. Nos ta spera cu nos lo tin salud y tempo pa sigui skirbi
den 2025 tambe. Nos ta laga e tema di e expo di Caha di Orgel cu a tuma lugar na Unoca algun
siman pasa, pa otro anja, un topico bibo cu no ta muri, pasobra e musica di Caha di Orgel tey pa
keda ! Nos ta laga tambe e tema di e dushi anochi di e Dinner Fund Raiser na O’Neil kitchen pa
otro anja, pasobra, e fundacion SFCNM tambe tey pa keda ! Nos lo relata un crenchi awe ariba
e dushi nochi di Karoekee na Star Studio den King Plaza Mall, cu a tuma lugar promer cu e expo
di Caha di Orgel y prome cu e anochi di recauda fondo pa Sociaal Fonds Colegio Nigel Matthew.
Nos tambe a canta bay gol na Star’s cu participacion di hopi bon cantante, tur cantando pa
hobby. Tawata reina un dushi ambiente total ! A canta den varios idioma, cancionnan diferente
variando di mariachi te cu Tammy Wynette”Stand by your man”, un di e favoritonan di Lady
Ruth. Nos grupo tawata consisti di Naomy, Vencher y su kerido esposo Gerson , Ruthy y su tia
di mas hoben Veny cu ta e mihor cantante den famia Tromp. Tawata tin mas gruponan, tur
“having fun” dal nan drankje y sigui canta “uit volle borst”. E cos bon awor ta, cu un di Star’s
nan bisinjanan restaurant ta tuma pedida di snacks, hapjes dushi pidi den Star’s y cu ta wordo
entrega na e clientenan hopi liher mes, dushi cayente, cu bon servicio ! Y papiando di bon
servicio, Lady Ruth tin e suerte di tur ora e bay cumpli cu Wit Gele Kruis, nan tin un of otro
celebracion andando. Wel e biaha ki nos a hanja un treat di Sinterklaas cu Zwarte of Witte Piet.
Un dushi cookie traha na Bright Bakery, hopi nechi hopi bunita, mucho bunita pa comele !!
Hahahahahah, e tawata dushi ! Nos ta combersa un ratito gezellig asina cu Sharlene y Liesbeth, e
curasonnan y caranan bunita di Wit Gele Kruis ! Y papiando di gezellig, un saludo pa bon
amiganan di Milly van Delden, cu awor ta nos amiganan tambe, esta Kristel Pauw y Chantal
Bomater cu a bay bek Hulanda despues di a goza di nan vakantie aki na Aruba! Nan a landa,
goza di nos bunita beachnan, nan a keiro tur rond di Aruba y nan a bay cu Ruthy y Milly dal un
drankje na Plaza Café , bayla un crenchi eynan y Lady Ruth a hiba nan tambe na nos famoso Bon
Bini Festival den Forti Willem III Toren, Nan a goza un mundo ! Nan a goza jump riba e dushi
musica di Brass Band na final di e show cu e grupo fantastico di bayla di The Popcorn Dancers
den nan costuumnan bunita di Carnaval. Lady Ruth a hanja e peticion si por manda maske ta un
poema di Pascu y fin di anja pa nos dushi hendenan di Diario, Solo, Extra Bonaire y EANEWS,
locual nos lo purba manda otro siman anto, wak si toch lo tin espacio p’e. Danki na tur nos dushi
y bunita lectornan di nos relato “Sabiduria den nos alegria”! Y si nos no logra, for di awe un Bon
Pascu y un Felis y Bon Anja Nobo 2025 !!! Cu bendicion di salud, alegria y sabiduria pa nos tur.
