BonaireFeaturedInternacional

Segun konsehal Daisy Coffie di frakshon di M21: Nos ta pèrdiendo nos Boneiru outéntiko

Daisy Coffie

Mester aktua awor i no warda mas!

Frakshon di M21 a tuma nota di e rapòrt ku a sali resientemente bou di e título “Vergunningverlening, toezicht en handhaving (VTH) door het Openbaar Lichaam Bonaire”. Esaki ta un asina yamá ‘nulmeting’ (un bista di e situashon aktual) riba enkargo di sekretario di estado di Infrastruktura   i Maneho di Awa. A hasi un investigashon spesífikamente riba dunamentu di pèrmit, supervishon i mantenshon di lei pa loke ta trata ehekushon di e tareanan akí relashoná ku konstrukshon, medio ambiente i naturalesa.

E rapòrt final ta konsistí di kasi 70 página i ta terminá ku un konklushon i vários rekomendashon. E konklushon ku henter e sistema di duna pèrmit, pero tambe e sistema di supervisá i mantené nos reglanan i leinan riba tereno di konstrukshon, medio ambiente i naturalesa no ta bon, no a bin komo sorpresa pa frakshon di M21. Durante e periodo tras di lomba ta hopi kaso tabatin ku a bin den publisidat, kaminda klaramente por a konstatá violashon di nos reglanan i leinan, konstrukshon ilegal, akusashon di metementu di polítika den maneho, empleadonan públiko ku lo ta violá nan huramentashon, kultura di miedu den e aparato ets.

Kasonan manera e rotònde na Kaya Amsterdam, konstrukshon di e di 5 piso, kaso di Chogogo ku menasa serio kontra empleadonan públiko, rapòrt di periodistanan di “Follow the money” ku a eksponé ròl di nos eks gezaghèber negativamente, posibel partisipashon di mandatarionan den desishonnan dudoso ta fresku den nos memoria. Loke e rapòrt a hasi ta pone lus skèrpi riba e mal funshonamentu aki. 

Loke mas ta preokupá nos frakshon ta ku e rapòrt ta kuminsá ku e rekomendashon pa gobièrnu Hulandes riba término korto pone ehekushon di henter e pakete di duna pèrmit, supervishon i mantenshon di lei pa loke ta trata konstrukshon, medio ambiente i naturalesa bou di un servisio na Hulanda. Pues miéntras nos ke konvensé Hulanda ku nos mester haña mas outonomia den nos asuntunan interno, tin un desaroyo ta bai nèt kontrali.

A keda probá ku e aktual gobernashon ku ta un kontinuashon di e koalishon UPB-MPB ku a sinta for di 2019 ta inkapas pa goberná e isla akí i ta pone ku Boneiru ta pèrdè su outogobernashon poko poko pero sigur. Den e kaso di Chogogo Konseho Insular unánimamente a akseptá pa bin un enkuesta, pero te awe ni sikiera a bin huntu pa papia kon ta bai organisá e enkuesta aki. A kue e asuntu di rotònde tap’é i te awe no tin klaridat ken ta responsabel pa loke a pasa na e rotònde. Henter e asuntu rònt di Bonaire Holding Maatschappij, inkluso e asuntu di lus di e vèlt a keda tapá. No a hasi apsolutamente nada ku e informashon di kultura di miedu ku ta reina den e aparato i ku e eks direktor di direktorado di Planifikashon i Desaroyo, sr. Etienne v.d. Horst a ilustrá asina kla durante un presentashon den Konseho Insular.

Ta p’esei frakshon di M21 a tuma su tempu pa lesa e rapòrt aki promé ku nos a sali ku nos promé reakshon. Opviamente nos lo buska apoyo den Konseho Insular pa asina ku reseso terminá trese e tópiko aki den diskushon públikamente. Frakshon di M21 ta sumamente preokupá. 

E kresementu di nos poblashon deskontrolá, konstrukshonnan deskontrolá ku ta tumando lugá, menasa serio kontra nos medio ambiente i naturalesa, kombiná ku un falta total di supervishon i mantenshon di nos reglanan i leinan eksistente, falta di regulashon nobo pa kompanianan ku tin efekto serio riba nos naturalesa i medio ambiente ta indikashonnan ku nos ta pèrdiendo nos Boneiru outéntiko. Ta indikashonnan ku poulatinamente nos ta destruyendo nos Boneiru i ku nos ta stroba nos futuro generashonnan ku nan por disfrutá di e Boneiru ku nos antepasadonan a konstruí pa nos. E desaroyo akí no por kontinuá i M21 sigur lo buska apoyo den Konseho Insular pa nos posishoná nos mes den un forma kla i fuerte, ku un kuadro di maneho pa protehá i salbaguardiá interes di e isla akí i su poblashon. Nos mester aktua awor i no warda mas.

Related posts

Tin solucion pa mitiga aumento di prijs di productonan importa

EA News Author

Marka di kaya solar pa mas siguridat den tráfiko

EA News Author

Guarda Costa a yuda un boto di bela na St. Maarten pa yega bahia bek

EA News Author

1 comment

Leave a Comment

Whatsapp Message