Representantenan di frakshon di MAN den
Parlamento, a duna un splikashon detayá na Konseho Sosial-Ekonómiko (SER) riba e inisiativa di lei pa trese
ahustenan den e Ordenansa Landsverordening Omzetbelasting (OZB) 2024. Frakshon di MAN ta inisiadó
di e proyekto di lei aki. E kambionan proponé ta buska pa modifiká e karga fiskal aki di un manera mas ekilibrá,
dunando alivio na doñonan di bibienda chikí i gruponan vulnerabel den nos komunidat, miéntras ku
propietarionan di kasnan grandi, ku tin mas kapasitat ekonómiko, lo kontribuí mas na kaha di gobièrnu.
Segun outornan di e proyekto di inisiativa di lei, e struktura aktual di impuesto ta antikuá den sierto aspekto i no
ta reflehá e realidat ekonómiko aktual di Kòrsou. Ku e proyekto di inisiativa di lei nobo aki, balor i uzo di
propiedatnan inmueble lo tin mas peso den kalkulashon di e impuesto OZB, ku e resultado ku hendenan ku tin
bibienda modesto i/o gruponan vulnerabel ta haña mas protekshon, miéntras ku hendenan ku propiedatnan
grandi lo kontribuí di un manera mas proporshonal.
E proyekto di inisiativa di lei tambe ta inkluí medidanan pa stimulá kresementu ekonómiko sin pèrdè for di bista
e aspekto di integrashon sosial. E proposishon ta ofresé benefisionan fiskal dirigí riba sektornan manera
bibienda sosial i empresanan chikí, ku e speransa pa logra un ekilibrio entre desaroyo ekonómiko i hustisia
fiskal.
E inisiadonan di e proyekto di inisiativa di lei ta kere ku e reforma aki lo no solamente krea un fuente di ingreso
stabil pa gobièrnu, sino tambe habri espasio pa invershonnan den proyektonan ku ta di un magnitut sosial.
Ku e splikashon aki, SER tin sufisiente input relevante pa evaluá e proposishon den su kapasidat komo órgano
di konseho independiente riba materia sosioekonómiko, ofresiendo rekomendashonnan basá riba análisisnan
ekstenso balansá i responsabel.