Parlamentario di PPA Eduard Pieters a splica cu PPA a entrega mocion pa para e Rijskwet HOFA, pa sigui sinta cu gremionan comercial y sindical y tambe pa por renegocia e Rijkswet den caso cu e yega asina leu. Lamentablemente e mayoria di Parlamento no a honra esaki, y a mira cu e partidonan cu ta sostene gobierno (AVP-Futuro) a pasa un mocion cu nan ta reconoce e proceso di Rijkswet. Sr. Pieters ta describi locual cu a tuma luga como un dia hopi scur pa Aruba. Aworaki ta keda na Partidonan den oposicion pa sigui lucha pa mustra e amor cu tin pa Pais Aruba.
A puntra sr. Pieters kico por wordo haci di parti Parlamentarionan den oposicion awor cu toch e mayoria di Parlamento cu ta sostene gobierno a duna e luz berde pa sigui cu e proceso di Rijskwet na Hulanda. El a indica cu mester warda pa wak e desaroyo, pero mucho cambio ya no por wordo haci mas, pasobra ya gobierno a entrega esaki na Rijksministerraad, cual ta sumamente lamentabel.
Algo cu sigur pueblo mester tuma bon nota di dje, ta cu un grupito den Parlamento cu ta sostene e gobierno aki y entrega nos patria. E Parlamentarionan a tuma decision pa un pueblo sin tene cuenta cu e grupo di 13 sindicato cu tambe a indica cu nan no ta di acuerdo cu e Rijkswet. Asina nan entrega Aruba na un grupo di hende cu nos no por vota pa nan, pero awor nan si por tuma decision riba nos, pues pa e proximo eleccion wak bon pa ken bo ta vota y pa ken no, sr. Pieters a termina bisando.