E iniciativa di Parlamento Hubenil ta sigui demostra di ta un espacio di gran balor pa e hubentud Arubano. E programa aki no solamente ta brinda hobennan e oportunidad y e experiencia pa expresa nan mes libremente den un ambiente parlamentario, sino cu e ta fungi tambe como un catalisado pa fortalece nan curashi y empoderamento den comunidad.
E obhetivo principal di e plataforma aki ta pa capacita e hobennan pa nan bira mas vocal y prepara den futuro, uzando nan conocemento pa defende nan derechonan como hoben. E meta no ta unicamente pa nan bos wordo scucha pa gobierno y parlamentarionan, sino pa nan por haci un impacto real y constructivo cu nan bos.
E structura di Parlamento Hubenil ta parti den diferente rol esencial cu ta contribui na
e formacion di e participantenan:
Desaroyo di debate y pensamento critico: Hobennan ta siña e practica di debati, con pa trece argumentonan solido dilanti y con pa pensa di un manera critico.
Presentacion di ponencia y proyecto: Esnan cu ta asumi e rol di parlamentario hubenil ta bin cu ponencianan dilanti pa wordo debati, cu e meta pa genera posibel proyectonan pa e pais.
Ehecucion di proyectonan comunitario: E ministernan hubenil ta encarga pa ehecuta diferente proyectonan den comunidad hunto cu e demas hobennan, garantisando un nivel participativo caminda tur por duna un man.
Representacion nacional e internacional: Hobennan cu a cumpli 18 aña y cu ta fungi como representante hubenil ta ricibi e oportunidad pa representa Aruba na un nivel mas amplio, participando den debatenan tanto nacional como internacional.
Parlamento Hubenil ta un ambiente ameno, dinamico y educativo cu ta tuma luga entre e mesun hobennan. Tur hoben cu tin interes den participa ta cordialmente invita pa acerca e organisacion.
Pa esunnan cu ta desea di join of haya mas informacion, por pasa personalmente riba un diamars of diahuebs pa 3:00 di atardi na Parlamento Hubenil. Durante e bishita aki, e ekipo lo splica tur e actividadnan y proyectonan cu ta tuma luga durante henter aña.
