Dia 18 di Mei ACE Foundation a habri ofisialmente e di kuater edishon di “Siman di Muzik pa Mucha” ku un bunita presentashon na Creative World. E evento a habri ku un programa musikal y edukativo inspirá riba e tema di e aña aki ku ta: “Soña”. Pa e edishon aki, ACE Foundation a traha den kooperashon ku Santinos Films i Jamz Caribbean pa produsí 10 kantika nobo spesialmente pa mucha.
Maestra di seremonia Shaedra Baromeo a habri e atardi ku palabranan di bon biní, sigui pa un mensahe inspirador di Lilimar Valencia, representando direktiva di ACE Foundation. Valencia ku ademas ta un maestra di skol a splika di e poder ku musika tin pa stimula e proceso di enseñansa i memoria di un mucha.
Diputado Nina den Heyer tambe a duna un diskurso kaminda ela enfatisa ku musika ta un elemento esensial den nos komunidat. “Musika ta pone nos kurpa move, ta stimula nos sentimentu i ta fundamental tantu pa mucha komo pa nos grandinan. Musika ta bon pa salu mental. Diputado a sigui bisa ku nos mester pone enfoke riba kantikanan ku ta adekua pa mucha, Diputado den Heyer finalmente a felisita ACE Foundation pa nan di 5-aniversario.
Timoteo Silberie, direktur interino di SKAL, a agrega: “Nos tur tin un ritmo den nos bida. Nos tin ku laga e ritmo ku ta biba den kurason di nos muchanan guia nan pa logra nan soño.”
E show a sigui ku e presentashon di ACE Teens, ku a lansa 7 di e 10 kantika nobonan, i un videoclip di e artista hoben Valeria ku a estrena esaki . E kantikanan a trata e tema di soño, aspirashon i e importansia di musika edukativo pa motiva i guia mucha den manera positivo.
Invitadonan spesial manera J’Shua Davelaar (Rei di Tumba 2025) i Juliëndra Janga (ganadó di Kanto Krioyo Hubenil) tambe a trese nan talento riba e tarima.
E evento a dediká su energia tambe na e kampionnan di Pony League U-9 di Bonaire, komo parti di e gran selebrashon di talento lokal.
Durante e siman di muzik, skolnan lo risibí workshop di e músiko Roël Callister ku lo duna tatyer di ritmo i Nathaly Heyliger, ku lo siña muchanan traha instrumento for di material resiklá. Tur skol a resibí 10 kantika pa siña i baila hunto ku nan mucha i varios lesbrief ku dosentenan por usa pa duna e muchanan les .
E siman lo sera dia 24 di Mei ku un gran presentashon final na Creative World, ku ACE Teens i e grupo J-Sync for di Kòrsou. Esaki lo ta un momentu ku ta marká e
selebrashon di 5-aniversario di ACE Foundation.
Pa mas informashon i update, sigui ACE Foundation su Facebook.
