E simbolo di escudo na Bestuurskantoor a keda den centro di critica politico y nacional, segun parlamentario Edgar Vrolijk. E acto ta percibi como un desrespect na historia y simbolonan di Aruba, recordando traicion pasado di AVP y e salida di Juan Irausquin pa defende Aruba den su lucha pa status aparte.
Prome di januari 2026 a bira un dia y aña historico pa Aruba, un fecha cu marca su logro di status aparte, un momento unico cu mester wordo reconoci y valora. Segun vrolijk, sin e status aparte, Aruba no lo a logra e autonomianan y decisionnan cu awe por tuma pa su propio desaroyo.
Vrolijk a indica cu gobierno di Aruba a cuminsa celebra e logro, pero lamentablemente, segun vrolijk, generacion politico actual ta partido FUTURO, “no sa historia ni e significado real di e escudo di Aruba.” El a cualifica e acto di pone un escudo riba Bestuurskantoor como “un berguensa nacional y politico,” un simbolo cu no ta representa e balor y identidad real di Aruba manera e bandera y Himno.
Parlamentario Edgar Vrolijk a agrega cu e simbolo actual ta un version di 70 aña bieu, cu ta recorda un periodo dificil pa Aruba. El a menciona e salida di Juan Irausquin for di AVP den 1975, un paso cu a tuma pa defende Aruba y su pueblo contra decisionnan cu, segun vrolijk, a compromete autonomia di Aruba, incluyendo e reparticion 12-8 cu AVP a tuma den pasado entre Aruba y Corsou.
Vrolijk a enfatisa cu den 1949 Aruba a logra un cambio significativo danki na esfuerso di pueblo y lidernan cu tabata defende su autonomia. “Juan Irausquin a defende Aruba y su pueblo, y su lucha a contribui pa cu na 1986 Aruba a logra un status aparte unico den Reino Hulandes, un logro cu ningun otro isla den Caribe a logra,” el a recorda.
Segun Vrolijk, e simbolo actual riba Bestuurskantoor no ta refleha e balor di e status aparte, sino mas bien ta un recordatorio di traicion y manipulacion historico door AVP, cu a entrega Aruba durante e reparticion 12-8. El a critica tambe gobierno AVP-FUTURO pa falta di respet na emblemanan nacional, señalando cu nan a cambia color di escudo dependiente di e partido gobernante, pasando for di e color original cu a wordo aproba den 1955.
“E acto aki ta demostra falta di respet y consciencia historico den pensamento politico actual,” Vrolijk a conclui. El a enfatisa cu Aruba mester sigui balora su historia y simbolonan nacional, incluyendo Bandera, Himno y Escudo na su color original, como pilarnan di identidad y orguyo pa pueblo Arubano.