Na nomber di su henter famia, ciudadano Cius Servandieux a expresa su profundo gradicimento na Dokter John Croes pa e cuido, conseho y dedicacion cu e a mustra riba nan salud durante hopi aña.
Fin di aña ta tradicionalmente un momento di union, reflexion y gratitud, y e sentimento aki a bira realidad na fin di aña 2025 den e oficina di Dokter John Croes. Durante un momento inespera y motiva, e famia Servandieux a sorprende e dokter cu un gesto di aprecio, como reconocimento pa su compromiso continuo cu bienestar di nan famia.
Segun ciudadano Servandieux, Dokter Croes a hunga un papel importante den bida di su famia.
Servandieux a destaca cu Dokter John Croes ta conoci como un medico cu ta tuma tempo pa su pashentnan, ta scucha nan dolor y ta haci examennan completo, manera un profesional medico mester haci. Segun Servandieux, esaki ta un contraste claro cu e tendencia moderno unda contacto cu pashentnan ta limita, ta via telefono, asistentenan of medio digital.
Un otro aspecto cu e famia ta aprecia particularmente ta cu Dokter Croes no ta enfoca solamente riba ganancia financiero, sino riba calidad di bida di su pashentnan. Despues di hopi aña como pashentnan, Servandieux ta bisa cu e por confirma di experiencia propio e diferencia cu un enfoke humano y integral por haci den atencion di salud.
Ademas, e a subraya cu Dokter Croes ta trata di evita prescripcion innecesario di medicamento, y ta evalua opcionnan alternativo manera medicina natural y yerba, si e situacion di salud di e pashent ta permiti esaki. Segun Servandieux, mirando e desaroyo global den medicina natural, ta importante pa Aruba y su gobierno no keda atras den reconoci y incorpora e conocemento nan aki den e sistema di salud.
Servandieux a expresa cu Aruba ta bendiciona cu tin un profesional di e caliber di Dokter John Croes, cu su experticio ta wordo aprecia internacionalmente y cu ta colabora cu expertonan y profesornan di exterior. No obstante, e a lamenta cu localmente, segun Servandieux, e sistema di salud no semper ta ofrece e reconocimento y oportunidadnan cu un profesional Arubiano di e nivel aki merece.
“Aruba ta enfrenta un scarsedad di dokter, mientras tin dokternan local cu ta stima y dispuesto pa contribui, pero no semper ta haya e espacio pa sigui sirbi su pais,” a indica Servandieux. E a añadi cu contratacion di dokter for di otro pais, cu ta implica costo mas halto, no semper ta resulta den e nivel di servicio cu e comunidad ta spera.
Pa finalisa, ciudadano Cius Servandieux a enfatisa cu Dokter John Croes merece un posicion di honor pa por sigui comparti su conocemento cu generacionnan nobo y contribui na futuro di e sector medico na Aruba. “Dokter John Croes ta mas cu un dokter di cas; e ta un ehemplo di vocacion, humanidad y amor pa e profesion como dokter.