Cu e inicio di un aña escolar nobo acercando, Centro di Bario Noord, den colaboracion cu Rode Kruis Aruba, ta prepara dos mainta special di “reparticion di Paña re-uzabel”, unda mayornan y miembro di comunidad por haya paña y posibel uniform di scol den bon estado.
E iniciativa ta forma parti di e esfuerso pa brinda sosten y alivio na famianan di e comunidad di Noord, specialmente durante e periodo di preparacion pa e aña escolar nobo. Cu costo di materialnan escolar y paña por representa un reto pa algun famia, e mercado ta ofrece un oportunidad pa haya paña di segunda man den bon condicion y, na mes momento promove reutilisacion y solidaridad dentro di comunidad.
E mercado lo tuma luga durante dos mainta, riba diahuebs 13 y diabierna 14 di augustus, for di 10:00 di mainta te 3:00 di atardi, na Centro di Bario Noord.
Durante e dos dianan, lo tin un gran cantidad di paña den bon estado disponibel pa esnan interesa. E paña lo wordo distribui riba un base di esnan cu yega prome lo tin prome oportunidad pa scoge entre e articulonan disponibel. Pa e motibo aki, mayornan y otro miembronan di comunidad ta wordo anima pa bini tempran.
Ademas di e paña disponibel, mayornan cu tin uniform di scolnan di Noord den bon estado
cu nan no ta usa mas, por contribui na e iniciativa door di trece esakinan tambe. E uniformnan por haya un segundo uso y yega na un otro alumno cu por tin necesidad di nan.
Centro di Bario Noord y Rode Kruis Aruba ta invita mayornan y famianan di Noord pa probecha di e oportunidad y participa den e mercado. E iniciativa ta un bon ehempel di con colaboracion comunitario por yuda famianan, reduci desperdicio y promove un cultura di comparti y yuda otro.
E organizadornan ta spera cu e mercado lo contribui na un inicio di aña escolar mas facil pa hopi famia. Tambe ta un oportunidad pa comunidad uni, comparti recurso y mustra solidaridad cu otro.
Detaye di e evento:
Fecha: 13 y 14 di augustus 2026
📌 Orario: 10:00 AM – 3:00 PM
📌 Luga: Centro di Bario Noord
📌 Nota: Disponibilidad ta riba un base di “First Come, First Serve”
Centro di Bario Noord y Rode Kruis Aruba ta invita tur esnan cu por beneficia di e iniciativa pa no perde e oportunidad.