Na Rincon durante e lunanan binidero nan ta investigá kon hóben i mucha ta hasi uso di e Cruyff Court, e sala di deporte i e parke di hunga. E investigashon mester duna klaridat tokante kuantu hóben i mucha ta hasi uso di e terenonan akí. I tambe si tin mester di kambio na e sitionan akí. Ta hasi e investigashon riba enkargo di Indebon den kolaborashon ku ministerio di Salubridat Públiko, Bienestar i Deporte (VWS). E investigashon ta dura te ku luna di febrüari 2024.
E investigadónan ta ansioso pa sa entre otro kuantu aña e hendenan tin ku ta hasi uso di e court, e sala di deporte i e parke di hunga. Tambe nan ke sa kuantu persona ta hasi uso di e sitionan akí tur dia i kua ta oranan ku ta mas drùk. A base di e investigashon nan ta wak si tin kos ku mester drecha na e tres sitionan akí. E investigashon ta konsistí di dos parti.
Den un parti di e investigashon nan ta konta e usuarionan. Esaki ta sosodé ku un kashi spesial, e PYRO box, ku ta midi moveshon i ku ta manda informashon pa un kòmpiuter. E boxnan ta traha ku radiashon, pues no ta saka potrèt ni hasi grabashon di e usuarionan. E box ta konta kuantu hende ta drenta i sali na e court, e sala di deporte òf e parke di hunga. Na e parke di hunga nan ta kologá dos ‘box’, un na e Cruyff Court i un na e espasio pafó di e sala di deporte.
Den e otro parti di e investigashon e investigadónan ta wak kon e usuarionan ta hasi uso di e court, e sala di deporte i e parke di hunga. Nan ta entrevistá e usuarionan pa medio di un lista di pregunta. Tambe nan ta entrevistá representantenan di e skolnan i organisashonnan di deporte ku ta hasi uso di e court, e parke di hunga i e sala di deporte. E representantenan akí ta sòru pa e hendenan ku nan ta representá tambe haña e lista di pregunta pa kontestá. Ta spera resultado di e investigashon despues di luna di mart 2024.