Siman pasa Minister Maduro hunto cu Minister Arends a reuni cu director di Aduana y expertonan di Departamento di Naturalesa y Medio Ambiente riba e Ley di Prohibicion di plastic di un solo uzo. Den practica e implementacion di e Ley tin algun punto cu ta dificulta e trabou di Aduana y esaki ta tarda e proceso di importacion. Pa e motibo aki, Gobierno lo bay presenta un cambio di ley na Parlamento pa por brinda mas claridad riba cual ta e productonan di plastic cu por wordo importa y cual ta wordo considera como plastic di un solo uzo. Algun cambio cu e Ley di prohibicion di plastic di un solo uzo mester por conta cu ne ta, e oportunidad pa haci obheccion (bezwaar) y tambe mester stipula e proceso cu Aduana mester tene na dje ora di destrui e productonan cu wordo tuma den beslag. Hunto cu e cambio di Ley, lo formula un maneho mas eficiente pa asina tur hende por cumpli miho cu e Ley di Prohibicion di plastic di un solo uzo na bienestar di Aruba su medio ambiente.
