Turismo Corporacion Bonaire a ricibi mas cu 35 ‘influencer’
Den weekend di 9 pa 12 di september Turismo Corporacion Bonaire (TCB), den colaboracion cu Diamond Public Relations, a yama bonbini na un grupo di 35 Tik Toker prominente for di Merca y Canada. Cu un alcance conhunto di mas cu 40 miyon siguido riba Tik Tok y Instagram, e influencer nan aki pa medio di‘content’ atractivo a mustra Boneiro su atraccionnan cultural y ecologico.
Tik Tok, cu tur luna ta conta cu 1500 miyon usuario activo, a mira un aumento considerabel di siguido adulto, particularmente den grupo di edad di 18 pa 34 aña, di manera cu el a bira un plataforma crucial pa anunsiantenan.
Durante e evento di Tik Tok Island Hop, influencernan, for di personalidadnan di television te amantenan di buceo, a sumergi nan mes den Boneiro su cultura local, su naturalesa y su festividadnan. A conclui e biahe cu un fiesta extravagante rond di piscina di Grand Windsock Bonaire cu musica latino Caribense ‘live’. Por mira ‘content’ di e evento akí riba Tik Tok y Instagram @BonaireIsland di TCB.
Despues di Boneiro e influencernan a mustra e facilidad di ‘island hopping’, ora nan a continua nan biahe pa Corsou. Un gradicimento sincero ta bai pa e numeroso partnernan cu a hasi e Tik Tok Island Hop un exito, entre otro Bamboo Bonaire, Blue Classroom, Bonaij Adventure Tours, Bonaire Vacation Villas, Cadushi Distillery, Divi Divi Air, Epic Tours Bonaire, Grand Windsock Bonaire, Landsailing Adventures Bonaire, Senses y hopi mas.