Ministerio di Husticia, Integracion, Transporte Publico y Energia, bao di liderato di mr.
drs. Arthur Dowers, pa medio di un aviso final riba su pagina di Facebook, a indica cu lo no
tolera e uzo y presencia di e-step, e-bike y e-scooter ilegal riba caminda publico.
Pa Gobierno, desaroyo no por bay riba costo di siguridad, orden publico y responsabilidad legal.
Vehiculonan electrico cu no ta cumpli cu normanan legal y tecnico, simplemente no ta permiti
riba caminda, acera ni otro espacio publico di Aruba.
Realidad ta mustra cu problema a bira un free for all, specialmente den area turistico. E
boardwalk, caminda y areanan rond di hotelnan ta yena cu e vehiculonan aki, creando
situacionnan di peliger pa peaton y otro usuario di trafico.
Minister Dowers ta considera e situacion aki inaceptabel. Orden y siguridad den espacio publico,
ta un prioridad cu no por wordo comprometi y sigur no ignora manera a pasa durante e ultimo
gobierno.
Di acuerdo cu e Landsverordening wegverkeer (AB 1997 no.18), tur vehiculo cu ta funciona
como vehiculo di motor (gasolin, diesel, gas, electrico etc) mester cumpli cu exigencianan
tecnico, registracion y seguro pa por ta riba camindanan publico. Basa riba e Algemene
Politieverordening (APV art. 15 & 23), polis por confisca tur vehiculo cu ta ocupa espacio
publico sin permiso of cu ta obstaculisa trafico.
Pa Minister Dowers, e decision aki no ta “rocket science” sino un decision basa riba e principio
di siguridad publico y respet pa nos leynan. E advertencia publico continuo durante e ultimo
tempo pa doñonan kita e vehiculonan aki for di espacionan publico no a haya oido, loke ta un
falta di respet pa nos leynan.
E mensahe di Minister Dowers tabata cla: “kita e vehiculonan aki for di caminda publico of
autoridad lo bay cu nan” y awo lo tuma accion.
Ultimo aviso: Minister Dowers ta actua contra uzo ilegal di e- step, e-bike y e-scooter riba caminda publico
