Prome Minister Evelyn Wever-Croes a duna un discurso
elocuente durante e Acto Protocolar na ocasion di celebracion di Dia di Himno y Bandera.
Prome Minister:
Su Excelencia Gobernador di Aruba, Presidente di Parlamento, Vice Presidente di Parlamento
y miembronan di Parlamento di Aruba y Corsou, Diputado, y miembronan di conseho insular
di Boneiro, colega ministernan di Aruba, Cuerpo Consular y Invitadonan,
Masha masha pabien awe cu celebracion di nos Dia di Himno y Bandera y danki pa acepta
nos invitacion, pa celebra e dia importante aki cu nos. Mi kier duna un danki special na esnan
cu a bin di exterior pa ta cu nos awe.
Awe nos ta recorda cu 49 aña pasa, pa prome biaha, nos bandera a wordo hisa den stadion
Guillermo Prospero Trinidad, e tempo ey conoci como Wilhelmina Stadion. Mes ora despues
nos himno a wordo toca pa prome biaha.
Historia
Permiti mi bai un tiki den historia, 49 aña pasa, na aña 1976. Gobierno Insular di Aruba a
tuma e decision cu 18 di maart ta bira nos Dia Nacional, esta nos Dia di Himno y Bandera. E
tempo ey caba Betico Croes dfm, tabata lidera e lucha pa concretisa e deseo di nos pueblo pa
bira un pais. Y e tabata sa cu un pais sin su bandera y sin su himno ta un pais sin destino
Den e cuadro aki un Comision di Himno a ser institui na januari 1976. Nan a propone pa haci
e cancion popular ‘Aruba Dushi Tera’ e himno nacional di Aruba. E cancion aki, di Padu
Lampe cu composicion di Rufo Wever, tabata hopi popular caba na Aruba desde añanan 50.
Tambe a keda dicidi cu lo añadi un di tres couplet, di Hubert “Lio” Booi. E di tres couplet lo
mester a expresa e deseo ferviente di nos pueblo e tempo ey, e di 3 couplet ta bisa:
Grandeza di bo pueblo ta su gran cordialidad
Cu Dios por guia y conserva su amor pa libertad
Gobierno Insular di Aruba a institui tambe un Comision di Bandera cu e tarea pa organisa un
concurso den pueblo pa un diseño di un bandera di Aruba. A drentra no menos cu 693
proposicion.
Di esaki e comision a propone na Eilandsraad:
nos bandera blauw; pa e color di lama y di shelo,
dos strepi geel; pa e oro, aloe, industria y turismo,
ariba un strea cora di 4 punta; cora pa e sanger di indian y e rand blanco rond di e strea pa nos
playanan bunita.
Riba dia 16 di maart 1976, Eilandsraad a aproba ‘Aruba Dushi Tera’ como himno oficial di
Aruba, y a aproba e diseño di e bandera oficial di Aruba.
Y dos dia despues, esta 18 di maart 1976, e acto oficial a tuma lugar, caminda a proclama
oficialmente nos Himno y Bandera y esaki den presencia di miles di nos ciudadanonan.
Mescos cu varios di boso aki, ami tabata un di e ciudadanonan ey, e tempo ey mi tabata un
mucha di 9 anja. Mira nos bandera wordo hisa pa prome biaha, y scucha e himno pa prome
biaha como himno, a hasi un impresion grandi riba mi, un impresion cu ta keda cumi cada
biaha cu mi mira nos bandera wordo hisa, y scucha e himno wordo toca y canta.
Bishita na scolnan
Pero e ta un experiencia aun mas emocionante, ora mi mira nos muchanan experiencia e
mesun sensacion.
Ya desde cuminsamento di e luna aki nos tur por a sinti caba e vibracion pa loke ta e
celebracion di nos Dia Nacional. E festivalnan di canto y poesia cu composicionnan y
interpretacionnan sumamente bunita reflehando e amor pa nos pais; e ferianan cultural rond di
henter nos isla; e marcha cultural di Colegio Pastoor Kranwinkel na Paradera siman pasa
diabierna; e Manifestacion Cultural ayera nochi aki na Plaza Betico Croes cu un explosion di
creatividad, innovacion y amor pa nos patria. Den nomber di Gobierno di Aruba mi ta gradici
tur esnan cu a hasi tur e eventonan aki asina exitoso.
Den nomber di pueblo di Aruba mi kier expresa un danki special na nos maestro- y
maestranan pa e forma con nan ta prepara nos alumnonan y celebra cu nan, nos Himno y nos
Bandera. E aña aki mi tabata tin e honor di bishita varios scol atrobe, y e recepcion tabata hopi
caluroso.
E parti mas mas special ta keda, na momento cu mi mira tur e alumnonan di scol, para hunto,
uni dilanti nan scol. Y riba nan cara expresion di inocencia, entusiasmo y speransa, hisando e
bandera y cantando e himno, “uit volle borst”, manera na Prinses Amalia School siman pasa.
Danki pa sigui inculca den curason di nos muchanan, e amor pa nos Himno, nos Bandera y
nos dushi Aruba. Asina, unda cu nan bai riba mundo, nan lo ta un embahador di Aruba, y
representa Aruba dignamente. E ora nos por ta trankil, cu ora yega nan turno, nan lo cuida y
stima e pida baranca aki, mes of mas hopi cu nos ta stim’e y ta traha p’e.
Nos Libertad
Nos Himno y nos Bandera ta simbolonan di nos libertad. Y esaki tabata un deseo ferviente di
nos pueblo na anja 1976, ora ainda e pueblo di Aruba no tabata sa cu 10 aña despues nos lo
logra nos Status Aparte.
Libertad ta un palabra significante pa tur pais na mundo cu den nan historia a biba y hiba un
lucha a base di sanger, sodo y lagrima pa por a logra e ideal aki. Tin paisnan cu na e
momentonan aki ta luchando pa conserva nan libertad.
E resiliencia di nos pueblo
Aruba tambe a hiba su bataya pa libertad, y esaki a ser realisa danki na e union di e pueblo
Arubano. Un union caminda no ta reina division. Nos a prueba cu un pueblo uni hamas por ser
hundi.
Y nos a demostra esaki na varios biaha den historia di nos pais, desde nos Status Aparte 39
aña pasa. Recien tambe, durante e pandemia mundial Covid-19, cu tabata tin un impacto
devastador pa Aruba, tipifica pa hopi perdida, perdida di bida di familiar y amigonan, impacto
riba salud; mental y fisico, interupcion den educacion, muchanan cu mester a separa di nan
amigonan, perdida di entrada, perdida di negoshi y pa esnan mas vulnerable perdida di
speransa.
Sinembargo un biaha mas, inspira pa nos himno y bandera, mes resiliente cu nos matanan di
Watapana, mes firme cu nos barancanan den naturalesa, mes determina cu nos biento di pariba
cu ta supla constante e nubianan di mal tempo pa nan pasa bay, pa rayonan di solo bolbe
briya. Asina, uni, nos a lucha y saca nos pais padilanti memey di e olanan bruto.Y danki na e
esfuerso conhunto di tur ciudadano di nos pais y trahadonan den tur sector di nos comunidad,
awe Aruba ta muestra un recuperacion impresionante.
Awe nos tin un economia den pleno progreso y stabil, danki na crecemento di nos turismo,
maneho di finasas publico responsabel y sostenibel, cu pa di tres aña ta mustra surplusnan
financiero, cu desempleo mas abou den ultimo 20 añanan.
Esaki a permiti nos di cuminsa duna bek na comunidad, y na esnan mas vulnerabel. Den e
ultimo 7 añanan, apesar di e situacion dificil financiero di pais Aruba y di e fondo di SVB, a
aumenta e pensioen 5 biaha, a aumenta e sueldo minimo 4 biaha, e proposicion pa e di 5
aumento ta na Parlamento pa wordo trata, a aumenta e gehandicapten uitkering y a duna
empleadonan publico indexacion di salario despues di 8 aña.
E aña aki, 2025, ta premira un espacio financiero aun mas grandi, cu ta permiti pa duna aun
mas bek na esnan mas vulnerabel. Estudionan pa yega na un entrada minimo social ta
kedando cla, y e espacio financiero tambe tey. Cu esaki por yuda esnan mas vulnerabel den
nos comunidad pa por tin un bida digno.
Nos no ta ainda caminda cu nos mester ta, tin retonan grandi ainda cu ta pidi atencion y
solucion. Pero nos ta riba e bon caminda, pa hasi Aruba un pais mas fuerte y resiliente, cu por
percura pa su mes, reflehando asina e espiritu patriotico di nos bandera y himno.
Hopi motibo pa ta orguyoso
Awe ta un dia pa pone tur diferencia un banda, y celebra ARUBA, nos baranca tan stima.Y
nos tin hopi pa celebra. A pesar cu nos ta un isla chikito, nos a logra hopi. Desde un punto di
bista internacional, Aruba a desaroya den un isla fuerte, resiliente y exitoso den caribe. Nos ta
un isla pionero den turismo, pa henter mundo.
-Aruba ta e pais mas sigur den nos region, segun The Telegraph di Inglatera,
-Nos Eagle Beach ta e beach #1 den Caribe, y #3 den mundo, segúun Trip Advisor.
-Den innovacion, nos tin e “Aruba One Happy Pass”.
-Aruba a hala atencion internacional tambe, debi na e cantidad grandi di hende muhe den
liderazgo, den e articulo “Aruba where women lead” di The New York Times.
Conclusion
Awe riba nos Dia Nacional, ban reconfirma nos compromiso pa sigui traha den union, pa sigui
hiba nos dushi Aruba padilanti.
Cu mas recurso disponibel nos por sigui inverti den mehora e calidad di bida di nos
conciudadanonan, creando progreso sostenibel y innovativo cu oportunidad pa nos muchanan
y hobennan mayan y percurando cuido y un bida digno cu bienestar y trankilidad pa nos
grandinan.
Mi kier gradici Comicion Celebracion Dianan Nacional y colega Minister di Cultura Xiomara
Maduro, pa organisa e evento cultural di ayera nochi, y e Acto Protocolar di awe mainta, y tur
esnan cu a y ta haci e celebracion henter e siman un exito.
Cu esaki tambe ta cuminsa mesora e preparacionnan pa e celebracion di 50 aña di Himno y
Bandera y 40 aña di Status Aparte otro aña. Nos cada un, di awor caba, por cuminsa prepara
pa e festividadnan ey.
Pueblo Arubano, ban celebra awe den grandi nos Dia Nacional.
Hisa bo bandera cu orguyo, pasobra awe nos ta un pais autonomo den Reino Hulandes cu nos
propio simbolonan di Union y Libertad, nos Himno y nos Bandera. Pabien pueblo di Aruba cu
nos gran dia!
Cu Dios Todopoderoso sigui bendiciona nos dushi pais Aruba.