Playa, boka, kosta ta di hopi importansia pa un pueblo. Playa ta un medio pa hende por
pasa tempu ku famia, distraí, praktiká diferente deporte, siña landa, traha na su salú.
Pero playa ta un fuente di entrada tambe. E ta un medio ku piskadónan ta hasi uzo di
dje pa gana nan pan di kada dia. Ta masha hopi piskadó ta subi laman òf ta pone nan
reda pa kue piská ku nan ta bende ku pueblo pa asina haña kria nan famia
Pueblo di Kòrsou tin playanan masha bunita pero e pueblo mes no tin akseso liber na
gran mayoria di e playanan aki. Hopi di nan ta den mannan privá. E doñonan di e
terenonan aki ta traha konstrukshonnan stratégiko pa tene e pueblo afó, otronan tin
hotèlnan i apartamentunan konstruí hopi serka di e laman ku murayanan haltu di moda
ku e pueblo no tin akseso liber pa bai landa, distraí. Pa e pueblo hasi uzo di e playa e
tin ku paga pa entrada I e mester hasi uzo di e fasilidatnan ku e hotèl ta brinda ku ta
hopi kostoso.
Apesar ku na Kosta sur di Kòrsou nos tin alrededor di 58 playa, bo por konta riba dede
e kantidat di playanan ku ta liber i asesibel pa públiko. Akseso na playa ta un derechi
fundamental ku kada pueblo tin i ku mester respetá. Tin diferente tratado internashonal i
leinan lokal ku ta mustra bon kla derechi di un pueblo pa loke ta su propiedat natural.
Asina e tratado p.e. di BUPO (Internationaal Verdrag inzake burgerrechten en politieke
rechten, den den Art. 1 insiso 2 ta mustra ku tur pueblo tin derecho riba nan rikesa
natural. Pues nos playanan ta nos rikesa natural ku nos tin derechi di por hasi uzo liber
di dje. I den Kódiko Sivil buki 5 Art. 26 insiso 1 i 2 tambe tin skirbí ku lamannan i
kostanan ta propiedat di pueblo.
Banda ku e playanan aki ta será i pueblo di Kòrsou no por hasi uzo di nan, nos ta
konstatá tambe ku doñonan di hotèlnan ta hasi nogoshi ku turista na gran eskala ku nos
playanan sin kontribuí ku nada na kaha di gobièrnu. Nan ta hür stùl i parasòl, sirbi
kuminda i bibida kant’i awa kaminda e turista ta disfrutá di e playa. Tin ku tin skolnan di
buseo dentro di nan hotèl I ta kobra turistanan pa hasi uzo di e fasilidatnan aki. Pues
hasimentu di nogoshi ku propiedat di pueblo sin misèrikòrdia.
E pèrmit ku ta otorgá na invershonistanan ku ta bin aki pa konstruí apartamentu I òf
hotèl no ta enserá niun klousula kaminda nos mandatarionan ta eksiguí ku playanan
mester ta liber I asesibel pa pueblo di Kòrsou. Al kontrario kada biaha di nobo nos ta
konstatá kon ta duna nan pèrmit i man liber pa konstruí serka serka di laman i asta
konstruí den laman. Nos a kaba di mira èhèmpelnan na Baoase i Playa Hunku. Esaki ta
kontra tur derechinan internashonal i lokal. Pa loke ta konstrukshon den e
Landsverordening Maritiem beheer Curaçao tin prohibishon relashoná ku konstrukshon,
òf ponementu di ophetonan òf otro material den laman. Apesar di esei konstrukshon i
ponementu di kos di laman ta sigui bai manera nada no a pasa.
Otro aspektonan manera destrukshon di naturalesa i destrukshon di e habitat di
diferente piská i otro espesienan den naturalesa tampoko no ta respetá. Ta pèrmití
invershonistanan hasi daño na pal’i mangel (p.e. na Zakito), na refnan di koral i parti di
e naturalesa na Baoase.Ta hopi remarkabel kon pa sierto gruponan di ripiente den
sierto áreanan no tin niun ref di koral ku mester tene kuenta kuné i ta dal bai ku tur sorto
di konstrukshon kantu i den laman. Kousa Promé ta kontra di tur tipo di privatisashon di
playanan i ta hasi esfuerso máksimo pa riba término masha kòrtiku pueblo por haña
akseso na tur playa i kosta di Kòrsou sin niun eksepshon ni niun opstrukshon.
Kousa Promé ta garantisá ku niun playa, kosta lo ta privá mas. Laman ta asesibel i
grátis pa tur hende bibá na Kòrsou;
Traha i òf ahustá lei pa stòp definitivamente ku privatisashon di playa i dentro di un
periodo determiná traha pa haña esnan privatisá bèk.
Deklará tur playa boka i e strok di 20 meter propiedat nashonal;
Kousa Promé ta yega na un areglo obligatorio kaminda doñonan ku ta aproksimá
playa/kosta tin ku duna siudadanonan aseso via nan tereno privá na pa nan por alkansá
playa i kosta; I Kousa Promé ta deklará tur isla i península riba i rondó di Kòrsou
propiedat nashonal;
Pa garatisá sostenibilidat Kousa Promé ta desaroyá un maneho sostenibel basá riba
leinan vigente. Ta aktivá leinan lokal i tratadonan internashonal I kaminda ta nesesario
ta adaptá leinan i òf traha leinan nobo ku ta apropiá i ta garantisá sostenibilidat. Nos ta
eksiguí i imponé rèspèt pa naturalesa na i rondó di playa i kostanan di Kòrsou i ta
desaprobá tur trabou di konstrukshon ku por hasi daño na flora òf founa di Kòrsou.
